Vendhaya Keerai Chapathi Recipe : வெந்தயக்கீரை சப்பாத்தி

இன்று இரவு உங்கள் வீட்டில் சப்பாத்தி செய்யலாம் என்று திட்டமிட்டுள்ளீர்களா? ஆனால் சற்று வித்தியாசமான சப்பாத்தி சாப்பிட விரும்புகிறீர்களா? உங்கள் வீட்டில் வெந்தயக்கீரை உள்ளதா? அப்படியானால் அதைக் கொண்டு ஒரு சுவையான மற்றும் ஆரோக்கியமான வெந்தயக்கீரை சப்பாத்தி செய்யுங்கள். இந்த வெந்தயக்கீரை சப்பாத்தியை தயிர் மற்றும் ஊறுகாயுடன் சாப்பிட்டால் சூப்பராக இருக்கும்.

உங்களுக்கு வெந்தயக்கீரை சப்பாத்தி எப்படி செய்வதென்று தெரிந்து கொள்ள வேண்டுமா? கீழே வெந்தயக்கீரை சப்பாத்தியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* கோதுமை மாவு - 2 கப்

* வெந்தயக் கீரை - 1 கட்டு

* சாம்பார் பவுடர் - 1 டீஸ்பூன்

* கரம் மசாலா - 1/2 டீஸ்பூன்

* உப்பு - சுவைக்கேற்ப

* தண்ணீர் - தேவையான அளவு

* எண்ணெய்/நெய் - தேவையான அளவு

செய்முறை:

* முதலில் வெந்தயக் கீரையின் இலைகளை தனியாக எடுத்து, அதை பொடியாக நறுக்கிக் கொள்ள வேண்டும்.

* பின் ஒரு பாத்திரத்தில் கோதுமை மாவு, வெந்தயக் கீரை, சாம்பார் பவுடர், கரம் மசாலா மற்றும் உப்பு சேர்த்து, நீர் ஊற்றி நன்கு பிசைந்து கொள்ள வேண்டும்.

* பின்பு அதில் எண்ணெய் அல்லது நெய் சேர்த்து நன்கு மென்மையாக பிசைந்து கொள்ள வேண்டும்.

* பிறகு பிசைந்த மாவை உருண்டைகளாக உருட்டி, சப்பாத்தி போன்று அனைத்து உருண்டைகளையும் தேய்த்துக் கொள்ள வேண்டும்.

* பின்னர் ஒரு தோசைக் கல்லை அடுப்பில் வைத்து, கல் சூடானதும், அதில் சிறிது எண்ணெய் தடவி தேய்த்து வைத்துள்ள சப்பாத்திகளை முன்னும் பின்னும் வேக வைத்து எடுத்தால், சுவையான வெந்தயக்கீரை சப்பாத்தி தயார்.

குறிப்பு:

உங்களுக்கு வெந்தயக்கீரையின் கசப்புச் சுவை வேண்டாம் என்றால், வெந்தயக் கீரையை 1/2 டீஸ்பூன் எண்ணெயில் சேர்த்து 1 நிமிடம் வதக்கி, அதன் பின் கோதுமை மாவுடன் சேர்த்து பிசைய வேண்டும்.