மீன் வறுவல் சுவையில் வாழைக்காய் வறுவல் செய்வது எப்படி தெரியுமா?

இன்று தைப்பூசம் என்பதால், பலரது வீடுகளில் சைவ உணவுகளை தான் சமைப்போம். பெரும்பாலும் ஒரு நல்ல நாளில் சாம்பார் வைத்து, பொரியல், வறுவல் செய்து, வடை, பாயாசத்துடன் சாப்பிடுவோம். இன்று மதியம் சாம்பாருக்கு என்ன சைடு டிஷ் செய்வதென்று யோசித்துக் கொண்டிருக்கிறீர்களா? உங்கள் வீட்டில் வாழைக்காய் உள்ளதா? அப்படியானால் அதைக் கொண்டு மீன் வறுவல் சுவையில் ஒரு அட்டகாசமான வாழைக்காய் வறுவலை செய்யுங்கள். இந்த வறுவல் செய்வது மிகவும் சுலபம். பெரியவர்கள் முதல் குழந்தைகள் வரை அனைவரும் விரும்பி சாப்பிடும் வகையில் இருக்கும்.

உங்களுக்கு மீன் வறுவல் சுவையில் வாழைக்காய் வறுவல் செய்வது எப்படி என்று தெரிந்து கொள்ள வேண்டுமா? கீழே வாழைக்காய் வறுவல் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* வாழைக்காய் - 2 (தோலுரித்து, மெல்லிய மற்றும் பட்டைத் துண்டுகளாக வெட்டிக் கொள்ளவும்)

* உப்பு - சுவைக்கேற்ப

* மஞ்சள் தூள் - 1/2 டீஸ்பூன்

* தண்ணீர் - தேவையான அளவு

* எண்ணெய் - தேவையான அளவு

ஊற வைப்பதற்கு...

* சாம்பார் பவுடர் - 1 1/2 டேபிள் ஸ்பூன்

* மஞ்சள் தூள் - 1/2 டீஸ்பூன்

* கரம் மசாலா - 1 டீஸ்பூன்

* உப்பு - சுவைக்கேற்ப

செய்முறை:

* முதலில் வாழைக்காயை நீரில் போட்டு, அதில் உப்பு மற்றும் மஞ்சள் தூள் சேர்த்து அடுப்பில் வைத்து, வாழைக்காயை வேக வைக்க வேண்டும்.

* வாழைக்காய் வெந்ததும், அடுப்பை அணைத்துவிட்டு, நீரை வடிகட்டிவிட்டு, வாழைக்காயை ஒரு தட்டில் எடுத்து வைத்துக் கொள்ள வேண்டும்.

* பின் ஒரு பௌலில் ஊற வைப்பதற்கு கொடுத்துள்ள மசாலாக்கள் அனைத்தையும் போட்டு கலந்து கொள்ள வேண்டும்.

* பின்பு அதில் வேக வைத்துள்ள வாழைக்காயை சேர்த்து பிரட்ட வேண்டும்.

* பின்னர் ஒரு தவாவை அடுப்பில் வைத்து, அதில் எண்ணெய் ஊற்றி சூடானதும், வாழைக்காய் துண்டுகளைப் போட்டு, முன்னும் பின்னும் பொன்னிறமாக ப்ரை செய்து எடுத்தால், சுவையான வாழைக்காய் வறுவல் தயார்.

Image Courtesy: yummytummyaarthi