2 வாழைப்பழமும், 1 கப் கோதுமை மாவும் இருந்தா.. ஈவ்னிங் இப்படி செஞ்சு சாப்பிடுங்க.. ருசியானதும், சத்தானதும் கூட.

Vazhai Ilai Kolukattai Recipe In Tamil: மாலை வேளையில் உங்கள் வீட்டில் உள்ளோர், குறிப்பாக குழந்தைகள் சாப்பிட ஏதாவது இனிப்பாக கேட்கிறார்களா? அப்போது அவர்களுக்கு சத்தான ஒரு ஸ்வீட் செய்து கொடுக்க நினைக்கிறீர்களா? உங்கள் வீட்டில் வாழைப்பழமும், கோதுமை மாவும் உள்ளதா? அப்படியானால் அந்த இரண்டையும் கொண்டு அட்டகாசமான சுவையில் வாழைப்பழ கொழுக்கட்டை செய்து கொடுங்கள்.

இந்த கொழுக்கட்டையின் ஸ்பெஷலே வாழைஇலையில் வைத்து மடித்து வேக வைப்பது தான். இப்படி கொழுக்கட்டை செய்யும் போது, வாழைப்பழம் பிடிக்காத குழந்தைகளும் விரும்பி சாப்பிடுவார்கள். முக்கியமாக இந்த வாழைப்பழ கொழுக்கட்டை செய்வதற்கு மிகவும் சுலபமாக இருக்கும். மேலும் இது குழந்தைகள் மட்டுமின்றி பெரியோர்களும் விரும்பி சாப்பிடுமாறு இருக்கும்.

உங்களுக்கு வாழைப்பழ கொழுக்கட்டையை எப்படி செய்வதென்று தெரிந்து கொள்ள வேண்டுமா? கீழே வாழைப்பழ கொழுக்கட்டையின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* நாட்டுச்சர்க்கரை - 1 கப்
* தண்ணீர் - 1 கப்
* நெய் - 2 டீஸ்பூன்
* தேங்காய் - சிறிது (சிறு துண்டுகளாக்கப்பட்டது)
* நன்கு கனிந்த வாழைப்பழம் - 2-4 (சிறு துண்டுகளாக்கப்பட்டது)
* துருவிய தேங்காய் - 1/2 கப்
* ஏலக்காய் தூள் - 1/2 டீஸ்பூன்
* கோதுமை மாவு - 1 கப்
* அரிசி மாவு - 2 டேபிள் ஸ்பூன்
* வாழை இலை - சிறிது (சதுர துண்டுகளாக்கப்பட்டது)

செய்முறை:

* முதலில் ஒரு பாத்திரத்தில் 1 கப் நாட்டுச்சர்க்கரையை எடுத்து, அத்துடன் 1 கப் நீரை ஊற்றி அடுப்பில் வைத்து, நாட்டுச்சர்க்கரை நன்கு கரைந்ததும், அதை இறக்கி தனியாக வைத்துக் கொள்ள வேண்டும்.
* பின்னர் ஒரு வாணலியை அடுப்பில் வைத்து, அதில் நெய் ஊற்றி சூடானதும், துண்டுகளாக்கப்பட்ட தேங்காய் துண்டுகளை சேர்த்து, பொன்னிறமாக ப்ரை செய்து தனியாக ஒரு தட்டில் எடுத்து வைத்துக் கொள்ள வேண்டும்.
* பின் அதே நெய்யில் துண்டுகளாக்கப்பட்ட வாழைப்பழத்தை சேர்த்து 1 நிமிடம் நன்கு வதக்க வேண்டும்.
* பின்பு அதில் துருவிய தேங்காயை 1/2 கப் சேர்த்து 2 நிமிடம் வதக்க வேண்டும்.
* பிறகு அதில் ஏலக்காய் தூளை சேர்த்து கிளறி, கரைத்து வைத்துள்ள நாட்டுச்சர்க்கரை நீரை ஊற்றி கிளறி, கொதிக்க வைக்க வேண்டும்.
* கொதி வந்ததும், அதில் 1 கப் கோதுமை மாவு மற்றும் 2 டேபிள் ஸ்பூன் அரிசி மாவை சேர்த்து நன்கு கிளறி விட வேண்டும்.
* பின் அதில் வறுத்து வைத்துள்ள தேங்காய் துண்டுகளை சேர்த்து நன்கு கிளறி, கொழுக்கட்டை மாவு பதத்திற்கு கிளறி இறக்கி குளிர வைக்க வேண்டும்.
* கொழுக்கட்டை மாவானது ஓரளவு குளிர்ந்ததும், கொஞ்சம் கொஞ்சமாக எடுத்து ஒரு வாழை இலையில் வைத்து, மடித்துக் கொள்ள வேண்டும். இதேப் போன்று அனைத்து மாவையும் வாழை இலைகளில் வைத்து மடித்து, இட்லி தட்டில் வைத்துக் கொள்ள வேண்டும்.
* இறுதியாக இட்லி பாத்திரத்தை அடுப்பில் வைத்து, அதில் நீரை ஊற்றி அடுப்பில் வைத்து, நீர் கொதித்ததும், இட்லி தட்டை உள்ளே வைத்து மூடி, மிதமான தீயில் வைத்து, 7-8 நிமிடம் வேக வைத்து எடுத்தால், சுவையான வாழைப்பழ இலை கொழுக்கட்டை தயார்.