1/2 உளுந்தும், 1 முட்டையும் இருந்தா.. ஈவ்னிங் டைம்-ல இந்த ஸ்நாக்ஸை செய்யுங்க.. ருசியானதும், சத்தானதும் கூட..

Ulunthu Pancake: மாலை வேளையில் உங்கள் பிள்ளைகள் சாப்பிட ஸ்நாக்ஸ் கேட்கிறார்களா? அதுவும் வித்தியாசமான ஸ்நாக்ஸ் செய்து கொடுக்க கேட்கிறார்களா? உங்கள் வீட்டில் 1/2 கப் உளுத்தம் பருப்பு, 1 முட்டையும் இருந்தால், அதைக் கொண்டு அருமையான சுவையில் ஒரு பேன் கேக் செய்து கொடுங்கள்.

இந்த பேன்கேக் சற்று வித்தியாசமான சுவையில் இருந்தாலும், சத்தானது. இப்படியொரு ஸ்நாக்ஸை உங்கள் பிள்ளைகளுக்கு மற்றும் வீட்டில் உள்ளோருக்கு செய்து கொடுத்தால், அடிக்கடி செய்து கொடுக்குமாறு கேட்பார்கள்.

உங்களுக்கு இந்த உளுந்து பேன்கேக்கை எப்படி செய்வதென்று தெரிந்து கொள் வேண்டுமா? கீழே உளுந்து பேன்கேன் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* உளுத்தம் பருப்பு - 1/2 கப் (125 கிராம்)
* முட்டை - 1
* வெங்காயம் - 1 (பொடியாக நறுக்கியது)
* கேரட் - 1 (துருவியது)
* பச்சை மிளகாய் - 1 (பொடியாக நறுக்கியது)
* கொத்தமல்லி - சிறிது (பொடியாக நறுக்கியது)
* மஞ்சள் தூள் - 1 சிட்டிகை
* மிளகுத் தூள் - 1/4
* உப்பு - சுவைக்கேற்ப
* அரிசி மாவு - 1 டேபிள் ஸ்பூன்
* தண்ணீர் - 2 டேபிள் ஸ்பூன்
* எண்ணெய் - தேவையான அளவு

செய்முறை:

* முதலில் உளுத்தம் பருப்பை நீரில் 2 முறை கழுவிவிட்டு, பின் நீரை ஊற்றி, 20 நிமிடம் ஊற வைக்க வேண்டும்.
* 20 நிமிடம் கழித்து மிக்சர் ஜாரில் ஊற வைத்த உளுத்தம் பருப்பை சேர்த்து 2 டேபிள் ஸ்பூன் நீரைத் தெளித்து, நன்கு மென்மையாக அரைத்துக் கொள்ள வேண்டும்.
* பின்பு ஒரு பாத்திரத்தில் அரைத்த உளுத்தம் மாவை எடுத்து, அத்துடன் 1 முட்டையை உடைத்து ஊற்ற வேண்டும்.
* அதன் பின் அதில் பொடியாக நறுக்கிய வெங்காயம், பேச்சை மிளகாய், துருவிய கேரட் மற்றும் கொத்தமல்லியை தூவ வேண்டும்.
* பிறகு அதில் மஞ்சள் தூள், மிளகுத் தூள், சுவைக்கேற்ப உப்பு, அரிசி மாவு சேர்த்து, 2 டேபிள் ஸ்பூன் நீரைத் தெளித்து நன்கு போண்டா மாவு பதத்திற்கு பிசைந்து கொள்ள வேண்டும்.
* பின்னர் ஒரு சிறிய தவாவை அடுப்பில் வைத்து, அதில் சிறிது எண்ணெய் ஊற்றி, இரண்டு கரண்டி மாவை ஊற்றி, மூடி வைத்து 2 நிமிடம் மிதமான தீயில் வேக வைத்து, பின் மூடியைத் திறந்து, திருப்பிப் போட்டு, 1 நிமிடம் வேக வைத்து எடுத்தால், சுவையான உளுத்தம் பருப்பு பேன் கேக் தயார்.