2 கப் இட்லி மாவு இருந்தா.. ஈவ்னிங் டைம்-ல இந்த டீக்கடை போண்டாவை செஞ்சு சாப்பிடுங்க.. சூப்பரா இருக்கும்..

Tea Kadai Sweet Bonda Recipe In Tamil: மாலை வேளையில் பள்ளி முடிந்து பசியுடன் வரும் உங்கள் பிள்ளைகளுக்கு நன்கு சூடாகவும், மொறுமொறுப்பாகவும் ஸ்நாக்ஸ் ஏதாவது செய்து கொடுக்க நினைக்கிறீர்களா? அதுவும் அவர்களுக்கு காபி, டீ போடும் சமயத்தில் டக்கென்று ஒரு ஸ்நாக்ஸ் செய்ய வேண்டுமா?

அப்படியானால் டீக்கடை இனிப்பு போண்டாவை செய்து கொடுங்கள். இந்த போண்டாவிற்கு 2 கப் இட்லி மாவு இருந்தால் அருமையான சுவையில் செய்யலாம். இந்த போண்டா செய்வதற்கு மிகவும் சுலபமாக இருப்பதோடு, விரும்பி சாப்பிடக்கூடியவாறான சுவையிலும் இருக்கும்.

உங்களுக்கு டீக்கடை இனிப்பு போண்டாவை எப்படி செய்வதென்று தெரிந்து கொள்ள வேண்டுமா? கீழே டீக்கடை இனிப்பு போண்டா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* இட்லி மாவு - 2 கப்
* சர்க்கரை - 1 கப்
* அரிசி மாவு - 1/2 கப்
* கோதுமை மாவு - 1 கப்
* ஏலக்காய் தூள் - 1/2 டீஸ்பூன்
* சோடா உப்பு - 1/4 டீஸ்பூன்
* எண்ணெய் - பொரிப்பதற்கு தேவையான அளவு

செய்முறை:

* முதலில் ஒரு பாத்திரத்தில் 2 கப் இட்லி மாவை எடுத்துக் கொள்ள வேண்டும்.
* பின் அதில் 1 கப் சர்க்கரையை சேர்க்க வேண்டும்.
* அதன் பின் அதில் 1/2 கப் அரிசி மாவு, 1 கப் கோதுமை மாவு சேர்க்க வேண்டும்.
* அடுத்து அதில் ஏலக்காய் தூள் மற்றும் சோடா உப்பு சேர்த்து நன்கு பிசைந்து கொள்ள வேண்டும்.
* பின்பு பிசைந்த மாவை மூடி வைத்து 10 நிமிடம் ஊற வைக்க வேண்டும்.
* 10 நிமிடம் கழித்து பிசைந்த மாவை கைகளால் மீண்டும் நன்கு பிசைய வேண்டும்.
* மாவு சரியான பதத்தில் உள்ளதா என்பதை அறிய, கைகளை நீரில் நனைத்து, சிறிது மாவை எடுத்து உருட்டி போட்டால், சரியாக வர வேண்டும். அப்படி வந்தால், மாவு சரியான பதத்தில் உள்ளது என்று அர்த்தம்.
* இறுதியாக ஒரு வாணலியை அடுப்பில் வைத்து, அதில் பொரிப்பதற்கு தேவையான அளவு எண்ணெய் ஊற்றி சூடேற்ற வேண்டும்.
* எண்ணெய் நன்கு சூடானதும், பிசைந்த மாவை கொஞ்சம் கொஞ்சமாக எடுத்து உருட்டி, எண்ணெயில் போட்டு, பொன்னிறமாக பொரித்து எடுத்தால், சுவையான டீக்கடை இனிப்பு போண்டா தயார்.