2 வாழைப்பழம் இருந்தா.. ஈவ்னிங் எண்ணெயில் பொரிக்காம இந்த ஸ்நாக்ஸை செய்யுங்க.. டேஸ்டியா இருக்கும்...

Sweet Banana Balls In Tamil: மாலை வேளையில் உங்கள் வீட்டில் இருப்பவர்கள் ஏதாவது சாப்பிட கேட்பார்களா? அதுவும் உங்கள் குழந்தைகள் தினமும் வித்தியாசமாக ஏதாவது சாப்பிட விரும்புவார்களா? மாலை வேளையில் எப்போதும் பஜ்ஜி, போண்டா என்று எண்ணெயில் பொரித்து கொடுக்காமல், சற்று ஆரோக்கியமான ஸ்நாக்ஸ் செய்து கொடுங்கள்.

அதுவும் வீட்டில் 2 பெரிய வாழைப்பழமும், 1 கப் அரிசியும் இருந்தால், அற்புதமான சுவையில் ஸ்வீட் உருண்டை செய்யலாம். இந்த வாழைப்பழ ஸ்வீட் உருண்டை குழந்தைகள் முதல் பெரியவர்கள் வரை அனைவரும் விரும்பி சாப்பிடுமாறு இருக்கும்.

உங்களுக்கு வாழைப்பழ ஸ்வீட் உருண்டையை எப்படி செய்வதென்று தெரிந்து கொள்ள வேண்டுமா? கீழே வாழைப்பழ ஸ்வீட் உருண்டை ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* பெரிய வாழைப்பழம் - 2
* புழுங்கல் அரிசி/இட்லி அரிசி - 1 கப்
* முந்திரி - 5
* பாதாம் - 5
* ஏலக்காய் - 3
* துருவிய தேங்காய் - 1 கப்
* நாட்டுச் சர்க்கரை - 1/2 கப்
* நெய் - 1 டேபிள் ஸ்பூன்
* தேங்காய் - சிறிது (துருவியது)

செய்முறை:

* முதலில் வாழைப்பழத்தை இரண்டு துண்டுகளாக வெட்டி, இட்லி பாத்திரத்தில் வைத்து, 5-8 நிமிடம் வேக வைத்து எடுத்துக் கொள்ள வேண்டும்.
* பின்னர் ஒரு வாணலியை அடுப்பில் வைத்து, அதில் புழுங்கல் அரிசி/இட்லி அரிசியை போட்டு நிறம் மாறும் வரை நன்கு வறுத்து இறக்கி குளிர வைக்க வேண்டும்.
* பின்பு மிக்சர் ஜாரில் வறுத்த அரிசி, முந்திரி, பாதாம், ஏலக்காய் சேர்த்து நன்கு மென்மையாக அரைத்துக் கொள்ள வேண்டும்.
* பிறகு ஒரு பாத்திரத்தில் வேக வைத்த வாழைப்பழத்தை தோலை நீக்கிவிட்டு எடுத்துக் கொள்ள வேண்டும்.
* பின் அந்த வாழைப்பழத்தை மத்து கொண்டு நன்கு மசித்துக் கொள்ள வேண்டும்.
* பின்பு அதில் அரைத்த அரிசி மாவை சேர்த்து, அத்துடன் துருவிய தேங்காய் நாட்டுச்சர்க்கரை மற்றும் 1 டேபிள் ஸ்பூன் நெய் ஊற்றி கைகளால் நன்கு பிசைய வேண்டும்.
* பின் பிசைந்ததை சிறு சிறு உருண்டைகளாக பிடித்து, தேங்காய் துருவலில் பிரட்டினால், சுவையான வாழைப்பழ உருண்டை தயார்.