சுரைக்காய் இருந்தா... ஈவ்னிங் 10 நிமிஷத்துல இந்த வடையை செஞ்சு சாப்பிடுங்க.. டேஸ்ட் தாறுமாறா இருக்கும்...

Bottle Gourd Vada Recipe In Tamil: மாலை வேளையில் உங்கள் வீட்டில் உள்ளோர் ஸ்நாக்ஸ் கேட்கிறார்களா? உங்கள் வீட்டில் சுரைக்காய் உள்ளதா? ஆனால் அந்த சுரைக்காயை யாரும் விரும்பி சாப்பிடமாட்டார்களா? இருப்பினும், இந்த சுரைக்காயைக் கொண்டு மாலை வேளையில் வடை செய்யுங்கள்.

இதனால் சுரைக்காய் பிடிக்காதவர்களும் சுரைக்காய் வடையை விரும்பி சாப்பிடுவார்கள். மேலும் சுரைக்காயில் நீர்ச்சத்து அதிகம் இருப்பதால், கொளுத்தும் கோடையில் இதை அதிகம் உணவில் சேர்ப்பது மிகவும் நல்லது. மாலை வேளையில் 10 நிமிடத்தில் ஒரு வடை செய்ய நினைத்தால், இந்த சுரைக்காயை வடையை செய்யுங்கள்.

உங்களுக்கு சுரைக்காய் வடையை எப்படி செய்வதென்று தெரிந்து கொள்ள வேண்டுமா? கீழே சுரைக்காய் வடை ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* சுரைக்காய் - 250 கிராம்
* வெங்காயம் - 1
* பச்சை மிளகாய் - 2
* கறிவேப்பிலை - 1 கொத்து
* கொத்தமல்லி - 1 கையளவு
* உப்பு - சுவைக்கேற்ப
* கடலைப்பருப்பு - 2 டேபிள் ஸ்பூன்
* பாசிப்பருப்பு - 2 டேபிள் ஸ்பூன்
* கடலை மாவு - 1 1/2 டேபிள் ஸ்பூன்
* பச்சரிசி மாவு - 3/4 கப்
* எள்ளு விதைகள் - 2 டேபிள் ஸ்பூன்
* எண்ணெய் - பொரிப்பதற்கு தேவையான அளவு

செய்முறை:

* முதலில் சுரைக்காயின் தோலை நீக்கிவிட்டு, அதை துருவிக் கொள்ள வேண்டும்.
* பின் கடலைப்பருப்பு மற்றும் பாசிப்பருப்பை நீரில் 1/2 மணிநேரம் ஊற வைக்க வேண்டும்.
* பின்பு ஒரு பாத்திரத்தில் துருவிய சுரைக்காயை எடுத்து, அத்துடன் பொடியாக நறுக்கிய வெங்காயம், பச்சை மிளகாய், கறிவேப்பிலை, கொத்தமல்லி மற்றும் உப்பு சேர்த்து கைகளால் பிசைந்து விட்டு, 10 நிமிடம் ஊற வைக்க வேண்டும்.
* அதன் பின் அதில் ஊற வைத்த கடலைப்பருப்பு மற்றும் பாசிப்பருப்பை கழுவி சேர்த்துக் கொள்ள வேண்டும்.
* பிறகு அதில் கடலை மாவு, பச்சரிசி மாவு சேர்த்து, எள்ளு விதைகளை சேர்த்து நன்கு பிசைந்து விட வேண்டும்.
* ஒருவேளை மிகவும் கெட்டியாக இருப்பதாக உணர்ந்தால், சிறிது நீரைத் தெளித்துக் கொள்ளுங்கள்.
* பின் ஒரு வாழை இலை அல்லது பாலிதீன் கவரை எடுத்து, அதில் எண்ணெய் தடவி, பிசைந்து வைத்துள்ள மாவை சிறிது எடுத்து நடுவே வைத்து, தட்டையாக வடை போன்று தட்டி, நடுவே ஒரு துளையிட வேண்டும்.
* பின்பு ஒரு வாணலியை அடுப்பில் வைத்து, அதில் பொரிப்பதற்கு தேவையான அளவு எண்ணெய் ஊற்றி சூடானதும், தட்டி வைத்துள்ள வடையை சேர்த்து, பொன்னிறமாக பொரித்து எடுத்தால், சுவையான சுரைக்காய் வடை தயார்.