Malai Ice Cream: கொளுத்துற வெயிலுக்கு வெறும் 4 பொருளை வெச்சு குளுகுளு-ன்னு இப்படி ஐஸ்க்ரீம் செய்யுங்க..

Summer Special Homemade Malai Ice Cream Recipe In Tamil: கொளுத்தும் கோடை வெயிலுக்கு அனைவருக்குமே உடல் வெப்பத்தைக் குறைக்க குளுகுளுவென்று ஐஸ்க்ரீம் சாப்பிட வேண்டுமென்று தோன்றும். அதுவும் வீட்டில் குழந்தைகள் இருந்தால், எத்தனை ஐஸ்க்ரீம் வாங்கி கொடுத்தாலும் கட்டுபடியாகாது. ஆனால் அந்த ஐஸ்க்ரீம்மை வீட்டிலேயே ஆரோக்கியமான முறையில் செய்து கொடுத்தால், செலவும் மிச்சம், எவ்வளவு வேண்டுமானாலும் சாப்பிடலாம். முக்கியமாக இந்த ஐஸ்க்ரீம்மை வாங்க வெயிலில் சுற்ற வேண்டியிருக்காது.

இந்த ஐஸ்க்ரீம்மை பலவாறு செய்யலாம். உங்களுக்கு அதிகம் சிரமப்படாமல் சட்டென்று செய்யக்கூடிய ஐஸ்க்ரீம்மை தெரிந்து கொள்ள வேண்டுமா? அப்படியானால் மலாய் ஐஸ்க்ரீம்மை செய்யுங்கள். இந்த ஐஸ்க்ரீம் செய்வதற்கு அடுப்போ, முட்டையோ, பீட்டரோ எதுவும் தேவையில்லை. மிக்ஸி இருந்தாலே போதும், சட்டென்று செய்யலாம்.

இந்த மலாய் ஐஸ்க்ரீம் குறித்து கோமதீஸ் கிச்சன் என்னும் யூடியூப் தளத்தில் பகிரப்பட்டுள்ளது. உங்களுக்கு மலாய் ஐஸ்க்ரீம்மை எப்படி செய்வதென்று தெரிந்து கொள்ள வேண்டுமா? கீழே மலாய் ஐஸ்க்ரீம் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* ஃபுல் க்ரீம் மில்க்/ஹெவி க்ரீம் மில்க் - 3 கப்
* கண்டென்ஸ்டு மில்க் - 1 கப்
* ஏலக்காய் - 5 (பொடித்தது)
* மில்க் பிரட் - 3 துண்டுகள்
* குங்குமப்பூ - சிறிது (விருப்பமிருந்தால்)
* பொடித்த நட்ஸ் - சிறிது

செய்முறை:

* முதலில் மிக்சர் ஜாரில் 3 கப் ஃபுல் க்ரீம் மில்க் அல்லது ஹெவி க்ரீம் மில்க்கை எடுத்துக் கொள்ள வேண்டும்.
* பின் அதில் 1 கப் கண்டென்ஸ்டு மில்க்கை சேர்க்க வேண்டும்.
* பின்பு அதில் விருப்பமிருந்தால் குங்குமப்பூவை சேர்த்துக் கொள்ளலாம்.
* அடுத்து அதில் ஏலக்காய் பொடி மற்றும் 3 பிரட் துண்டுகளை சேர்த்து, நன்கு விட்டு விட்டு அடித்துக் கொள்ள வேண்டும். அப்படி அடிக்கும் போது நன்கு ஐஸ்க்ரீம் போன்று கெட்டியாக வரும்.
* பின்னர் ஒரு மூடியைக் கொண்ட எந்த ஒரு பாத்திரத்தையும் எடுத்து, அதனுள் ஒரு ஃபுட் வ்ராப் கவரை வைத்து, பின் அதன் மேல் அடித்து வைத்துள்ள ஐஸ்க்ரீம்மை சேர்த்து சமமாக பரப்பி, மூடி வைத்து, ஃப்ரீசரில் 1/2 நாள் வைத்து எடுக்க வேண்டும். அதாவது காலையில் வைத்தால், மாலை வேளையில் எடுக்க வேண்டும். இல்லாவிட்டால் இந்த ஸ்க்ரீம்மை ஐஸ் க்ரீம் மோல்ட்டில் ஊற்றியும் வைத்து எடுக்கலாம். எல்லாம் உங்கள் விருப்பம்.
* ஐஸ்க்ரீம் செட்டானதும், அதை வெளியே எடுத்து, ஒருமுறை குழாய் நீரில் அலசி, பின் மூடியைத் திறந்து, கவிழ்த்துப் போட்டு, கவரை நீக்கிவிட்டு, கத்தியால் துண்டுகளாக்கி, மேலே பொடியாக நறுக்கிய நட்ஸை தூவினால், சுவையான மலாய் ஐஸ்க்ரீம் தயார்.