சன்டே ஸ்பெஷல்: காரசாரமான... மல்லூர் சிக்கன் வறுவல்

இந்த வார இறுதியில் உங்கள் வீட்டில் சிக்கன் செய்ய திட்டமிட்டுள்ளீர்களா? ஆனால் ஸ்பெஷலாக ஏதாவது உங்கள் வீட்டில் உள்ளோருக்கு செய்து கொடுக்க விரும்புகிறீர்களா? அப்படியானால் மல்லூர் சிக்கன் வறுவலை செய்து கொடுங்கள். சேலம் அருகில் மல்லூர் என்ற ஊர் உள்ளது. அந்த பகுதியில் மல்லூர் சிக்கன் வறுவல் மிகவும் பிரபலமானது. இந்த மல்லுர் சிக்கன் வறுவல் சாதத்துடன் சேர்த்து சாப்பிட அற்புதமாக இருக்கும்.

உங்களுக்கு மல்லூர் சிக்கன் வறுவல் எப்படி செய்வதென்று தெரிந்து கொள்ள வேண்டுமா? கீழே மல்லூர் சிக்கன் வறுவல் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* சிக்கன் - 1/2 கிலோ
* பெரிய வெங்காயம் - 2 (பொடியாக நறுக்கியது)
* வரமிளகாய் - 10
* மல்லித் தூள் - 2 டீஸ்பூன்
* மிளகுத் தூள் - 2 டீஸ்பூன்
* இஞ்சி பூண்டு பேஸ்ட் - 1 டீஸ்பூன்
* நல்லெண்ணெய் - 1 டேபிள் ஸ்பூன்
* சோம்பு - 1 டீஸ்பூன்
* கறிவேப்பிலை - சிறிது
* கொத்தமல்லி - சிறிது
* தேங்காய் பால் - 1/2 கப்
* உப்பு - சுவைக்கேற்ப

செய்முறை:

* முதலில் சிக்கனை நன்கு கழுவி தனியாக வைத்துக் கொள்ள வேண்டும்.
* பின் ஒரு வாணலியை அடுப்பில் வைத்து, அதில் 1 டேபிள் ஸ்பூன் எண்ணெய் ஊற்றி சூடானதும், சோம்பு, கறிவேப்பிலை, வெங்காயம், வரமிளகாய் ஆகியவற்றை சேர்த்து வதக்க வேண்டும்.
* பின்பு அதில் இஞ்சி பூண்டு பேஸ்ட் சேர்த்து பச்சை வாசனை போக வதக்க வேண்டும்.
* அடுத்து அதில் சிக்கனை சேர்த்து நன்கு கிளறி விட்டு, சிக்கனை 7 நிமிடம் வேக வைக்க வேண்டும்.
* பின் அதில் மிளகுத் தூள், சுவைக்கேற்ப உப்பு சேர்த்து நன்கு கிளறி விட வேண்டும்.
* பின்பு அதில் மல்லித் தூளை சேர்த்து நன்கு கிளறி, சிறிது நீரை தெளித்து 3 நிமிடம் கிளறி விட வேண்டும்.
* இறுதியாக, அதில் சிறிது தேங்காய் பாலை ஊற்றி, 3 நிமிடம் கிளறி, மேலே கொத்தமல்லியைத் தூவி இறக்கினால், சுவையான மல்லூர் சிக்கன் வறுவல் தயார்.

Image Courtesy: ChefDamusMulticuisine