ரசம் சாதத்துக்கு ஒருடைம் சிக்கனை இப்படி செஞ்சு சாப்பிடுங்க.. சும்மா அல்டிமேட்டா இருக்கும்...

Somberi Chicken Roast Recipe In Tamil: வார விடுமுறை நாட்களில் வீட்டில் பல வெரைட்டியான அசைவ உணவுகளை சமைத்து சாப்பிடுவீர்களா? ஆனால் இன்று உங்களுக்கு சமைக்க சோம்பேறித்தனமாக உள்ளதா? ஆனால் ஏதாவது சமைத்தாக வேண்டும் அல்லவா?

அப்படிப்பட்ட சூழ்நிலையில் சிக்கனை வாங்கி வந்து, சோம்பேறி சிக்கன் ரோஸ்ட் செய்து, ரசம் சாதத்துடன் சாப்பிடுங்கள். ருசி அவ்வளவு பிரமாதமாக இருக்கும். சோம்பேறி சிக்கன் ரோஸ்ட் அதன் பெயருக்கு ஏற்பவே டக்கென்று செய்யக்கூடியவாறு மிகவும் சுலபமாக இருக்கும்.

உங்களுக்கு சோம்பேறி சிக்கன் ரோஸ்ட் ரெசிபியை எப்படி செய்வதென்று தெரிந்து கொள்ள வேண்டுமா? கீழே சோம்பேறி சிக்கன் ரோஸ்ட் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* சிக்கன் - 1/2 கிலோ
* எண்ணெய் - 3 டீஸ்பூன்
* பெரிய வெங்காயம் - 2 (பொடியாக நறுக்கியது)
* கறிவேப்பிலை - சிறிது
* உப்பு - 1 டீஸ்பூன்
* தண்ணீர் - சிறிது
* கொத்தமல்லி - சிறிது

அரைப்பதற்கு...

* சின்ன வெங்காயம் - 10
* பூண்டு - 5 பல்
* இஞ்சி - 1 துண்டு
* மிளகாய் தூள் - 1 டீஸ்பூன்
* கரம் மசாலா - 1 டீஸ்பூன்
* சிக்கன் மசாலா - 1 டீஸ்பூன்

செய்முறை:

* முதலில் சிக்கனை நீரில் நன்கு கழுவிக் கொள்ள வேண்டும்.
* பின்னர் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், பொடியாக நறுக்கிய வெங்காயம் மற்றும் கறிவேப்பிலை சேர்த்து நன்கு வதக்க வேண்டும்.
* பின் அதில் கழுவி வைத்துள்ள சிக்கனை சேர்த்து, சுவைக்கேற்ப உப்பு தூவி, 2 நிமிடம் கிளறி விட்டு வேக வைக்க வேண்டும். அதற்குள் மிக்சர் ஜாரில் சின்ன வெங்காயம், இஞ்சி, பூண்டு, மிளகாய் தூள், கரம் மசாலா, சிக்கன் மசாலா சேர்த்து நன்கு மென்மையாக அரைத்துக் கொள்ள வேண்டும்.
* பின்பு அரைத்ததை சிக்கனுடன் சேர்த்து கிளறி, சிறிது நீரை ஊற்றி பிரட்டி, மூடி வைத்து 10 நிமிடம் வேக வைக்க வேண்டும்.
* பின் மூடியைத் திறந்து, சிக்கனில் உள்ள நீர் வற்றும் வரை ரோஸ்ட் செய்து, கொத்தமல்லியைத் தூவி இறக்கினால், சுவையான சோம்பேறி சிக்கன் ரோஸ்ட் தயார்.