ராகி மாவும், பச்சை பயறும் இருந்தா.. ஈவ்னிங் டைம்-ல இப்படி கொழுக்கட்டை செஞ்சு குடுங்க.. விரும்பி சாப்பிடுவாங்க

Ragi Pachai Payaru Sweet Kozhukattai Recipe In Tamil: மாலை வேளையில் உங்கள் பிள்ளைகளுக்கு சத்தான அதே சமயம் வயிறு நிரம்பும்படியான ஸ்நாக்ஸ் செய்து கொடுக்க நினைக்கிறீர்களா? உங்கள் பிள்ளைகளுக்கு கொழுக்கட்டை என்றால் ரொம்ப பிடிக்குமா? உங்கள் வீட்டில் ராகி மாவும், பச்சை பயறும் இருந்தால், அதைக் கொண்டு அருமையான சுவையில் கொழுக்கட்டை செய்து கொடுங்கள். இந்த கொழுக்கட்டையில் நார்ச்சத்து மட்டுமின்றி, புரோட்டீனும் இருப்பதால், வளரும் குழந்தைகளுக்கு இந்த கொழுக்கட்டையை அடிக்கடி செய்து கொடுப்பது நல்லது.

உங்களுக்கு இந்த ராகி பச்சை பயறு இனிப்பு கொழுக்கட்டையை எப்படி செய்வதென்று தெரிந்து கொள்ள வேண்டுமா? கீழே ராகி பச்சை பயறு இனிப்பு கொழுக்கட்டை ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

வேக வைப்பதற்கு..

* பச்சை பயறு - 1/2 கப்
* தண்ணீர் - 2 கப்

கொழுக்கட்டைக்கு...

* ராகி மாவு - 2 கப்
* உப்பு - 1/4 டீஸ்பூன்
* தண்ணீர் - தேவையான அளவு
* துருவிய தேங்காய் - 1 கப்
* ஏலக்காய் தூள் - 1/2 டீஸ்பூன்
* நெய் - 1 டீஸ்பூன்
* வேக வைத்த பச்சைப்பயறு
* நாட்டுச்சர்க்கரை - சுவைக்கேற்ப

செய்முறை:

* முதலில் குக்கரில் பச்சை பயறை எடுத்துக் கொண்டு நீரில் 2 முறை கழுவி, பின் அதில் 2 கப் நீரை ஊற்றி குக்கரை மூடி அடுப்பில் வைத்து, மிதமான தீயில் வைத்து 3-4 விசில் விட்டு இறக்க வேண்டும்.
* விசில் போனதும் குக்கரைத் திறந்து, அதில் உள்ள அதிகப்படியான நீரை வடிகட்டி அகற்றிவிட்டு, தனியாக வைத்துக் கொள்ள வேண்டும்.
* பின்னர் ஒரு பாத்திரத்தில் 2 கப் ராகி மாவை எடுத்துக் கொண்டு, அதில் 1/4 டீஸ்பூன் உப்பு சேர்த்து கலந்து கொள்ள வேண்டும்.
* பிறகு அதில் கொஞ்சம் கொஞ்சமாக நீரை ஊற்றி, புட்டு மாவு பதத்திற்கு கலந்து, மூடி வைத்து 10 நிமிடம் ஊற வைக்க வேண்டும்.
* பின்பு இட்லி தட்டில் துணியை விரித்து, அதில் இந்த ராகி மாவை சேர்த்து, இட்லி பாத்திரத்தினுள் வைத்து, 10-15 நிமிடம் வேக வைத்து எடுக்க வேண்டும்.
* பின்னர் ஒரு தட்டில் வேக வைத்த ராகி மாவை எடுத்துக் கொண்டு, அதில் உள்ள கட்டிகளை கைகளால் உடைத்து நன்கு உதிர்த்து விட வேண்டும்.
* அடுத்து அதில் துருவிய தேங்காய், ஏலக்காய் தூள், நெய், வேக வைத்த பச்சை பயறு மற்றும் சுவைக்கேற்ப நாட்டுச்சர்க்கரையை சேர்த்து கைகளால் நன்கு கிளறி விட வேண்டும். இது அனைத்தையும் மாவு சூடாக இருக்கும் போதே செய்து விட வேண்டும்.
* இறுதியாக அந்த மாவை உருண்டைகளாக பிடித்தால், சுவையான மற்றும் சத்தான ராகி பச்சை பயறு இனிப்பு கொழுக்கட்டை தயார்.