காரசாரமான... இறால் பெப்பர் ப்ரை

Prawn Pepper Fry: நீங்கள் இறால் பிரியரா? அடிக்கடி இறால் வாங்கி சமைத்து சாப்பிடுவீர்களா? இதுவரை நீங்கள் உங்கள் வீட்டில் இறால் பெப்பர் ப்ரை செய்துள்ளீர்களா? இல்லையென்றால் அடுத்தமுறை இறாலை வாங்கினால், அதைக் கொண்டு இறால் பெப்பர் ப்ரை செய்து சாப்பிடுங்கள்.

இறால் பெப்பர் ப்ரை செய்வது மிகவும் சுலபம். இது ரசம் சாதத்துடன் சேர்த்து சாப்பிட அற்புதமாக இருக்கும். மேலும் இது குழந்தைகள் முதல் பெரியவர்கள் வரை அனைவரும் விரும்பி சாப்பிடுமாறு இருக்கும்.

உங்களுக்கு இறால் பெப்பர் ப்ரை எப்படி செய்வதென்று தெரிந்து கொள்ள வேண்டுமா? கீழே இறால் பெப்பர் ப்ரை ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

ஊற வைப்பதற்கு...

* இறால் - 20
* மிளகாய் தூள் - 1 டீஸ்பூன்
* மஞ்சள் தூள் - 1 டீஸ்பூன்
* இஞ்சி பூண்டு பேஸ்ட் - 1 டீஸ்பூன்
* உப்பு - சுவைக்கேற்ப
* எண்ணெய் - 3 டேபிள் ஸ்பூன்

வதக்குவதற்கு...

* பெரிய வெங்காயம் - 1 (பொடியாக நறுக்கியது)
* பச்சை மிளகாய் - 2 (நீளமாக கீறியது)
* கறிவேப்பிலை - சிறிது
* குடைமிளகாய் - 1 (நறுக்கியது)
* இஞ்சி பூண்டு பேஸ்ட் - 2 டீஸ்பூன்
* கரம் மசாலா - 1 1/2 டீஸ்பூன்
* மிளகுத் தூள் - 1 டீஸ்பூன்
* கொத்தமல்லி - சிறிது
* உப்பு - சுவைக்கேற்ப

செய்முறை:

* முதலில் இறாலை நன்கு சுத்தம் செய்து கொள்ள வேண்டும்.
* பின் கழுவிய இறாலை ஒரு பாத்திரத்தில் போட்டு, அத்துடன் ஊற வைப்பதற்கு கொடுத்துள்ள மிளகாய் தூள், மஞ்சள் தூள், இஞ்சி பூண்டு பேஸ்ட், சுவைக்கேற்ப உப்பு சேர்த்து நன்கு பிரட்டி தனியாக வைத்துக் கொள்ள வேண்டும்.
* பின்பு ஒரு வாணலியை அடுப்பில் வைத்து, அதில் 3 டேபிள் ஸ்பூன் எண்ணெய் ஊற்றி சூடானதும், இறால் துண்டுகளைப் போட்டு ஒரு நிமிடம் ப்ரை செய்து தனியாக எடுத்து வைத்துக் கொள்ள வேண்டும்.
* பிறகு அதே எண்ணெயில் வெங்காயம், பச்சை மிளகாய், கறிவேப்பலை சேர்த்து, சிறிது உப்பு தூவி ஒரு நிமிடம் வதக்க வேண்டும்.
* பின்னர் அதில் இஞ்சி பூண்டு பேஸ்ட் சேர்த்து ஒரு நிமிடம் வதக்க வேண்டும்.
* பின் அதில் குடைமிளகாயை சேர்த்து 2 நிமிடம் வதக்க வேண்டும்.
* அடுத்து, அதில் ப்ரை செய்து வைத்துள்ள இறாலை சேர்த்து நன்கு கிளறி, கரம் மசாலாவைத் தூவி கிளறி, மூடி வைத்து 4-5 நிமிடம் வேக வைக்க வேண்டும்.
* அதன் பின் மூடியைத் திறந்து, மேலே மிளகுத் தூள் மற்றும் கொத்தமல்லியைத் தூவி கிளறி இறக்கினால், சுவையான இறால் பெப்பர் ப்ரை தயார்.

Image Courtesy: yummytummyaarthi