1 கைப்பிடி வேர்க்கடலை வெச்சு தோசைக்கு இந்த சட்னியை செய்யுங்க.. டேஸ்ட் சும்மா அள்ளும்..

Peanut Tomato Chutney Recipe In Tamil: இன்று காலை உங்கள் வீட்டில் தோசை சுட போகிறீர்களா? அந்த தோசைக்கு என்ன சைடு டிஷ் செய்வதென்று யோசித்துக் கொண்டிருக்கிறீர்களா? அதுவும் இதுவரை வீட்டில் நீங்கள் செய்திராத ஒரு புதுமையான சட்னியை செய்ய நினைக்கிறீர்களா?

உங்கள் வீட்டில் 1 கைப்பிடி வேர்க்கடலை இருக்கா? அப்படியானால் அந்த வேர்க்கடலையுடன் தக்காளியை சேர்த்து சட்னி செய்யுங்கள். இந்த வேர்க்கடலை தக்காளி சட்னி தோசையுடன் மட்டுமின்றி, இட்லியுடன் சாப்பிடவும் அற்புதமாக இருக்கும். முக்கியமாக இது குழந்தைகளும் விரும்பி சாப்பிடுமாறு இருக்கும்.

உங்களுக்கு வேர்க்கடலை தக்காளி சட்னியை எப்படி செய்வதென்று தெரிந்து கொள்ள வேண்டுமா? கீழே வேர்க்கடலை தக்காளி சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எண்ணெய் - 2 டேபிள் ஸ்பூன்
* கடலைப் பருப்பு - 2 டேபிள் ஸ்பூன்
* வறுத்த வேர்க்கடலை - 1 கைப்பிடி
* வரமிளகாய் - 4
* பெரிய வெங்காயம் - 1 (பொடியாக நறுக்கியது)
* பெரிய தக்காளி - 1 (நறுக்கியது)
* புளி - சிறு துண்டு
* உப்பு - சுவைக்கேற்ப
* தண்ணீர் - தேவையான அளவு

தாளிப்பதற்கு...

* எண்ணெய் - 1 டேபிள் ஸ்பூன்
* கடுகு - 1/2 டீஸ்பூன்
* உளுத்தம் பருப்பு - 1/2 டீஸ்பூன்
* கறிவேப்பிலை - 1 கொத்து
* வரமிளகாய் - 1

செய்முறை:

* முதலில் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், கடலைப் பருப்பு சேர்த்து பொன்னிறமாக வறுக்க வேண்டும்.
* அதன் பின் வேர்க்கடலையை சேர்த்து 2 நிமிடம் வறுக்க வேண்டும்.
* அடுத்து வரமிளகாய் சேர்த்து உப்பி வரும் வரை வறுத்து, நறுக்கிய வெங்காயத்தை சேர்த்து கண்ணாடி பதத்திற்கு வதக்க வேண்டும்.
* பின்பு அதில் தக்காளியை சேர்த்து பாதி வதங்கியதும், புளியை சேர்த்து, தக்காளி நன்கு மென்மையாகும் வரை வதக்க வேண்டும்.
* பின் வதக்கியதை இறக்கி குளிர வைத்து, மிக்சர் ஜாரில் போட்டு, சுவைக்கேற்ப உப்பு மற்றும் சிறிது நீரை ஊற்றி சற்று கொரகொரவென்று அரைத்துக் கொள்ள வேண்டும்.
* பிறகு அரைத்த சட்னியை ஒரு கிண்ணத்தில் எடுத்துக் கொள்ள வேண்டும். பின் சட்னிக்கு தேவையான அளவு நீரை ஊற்றி கலந்து கொள்ள வேண்டும்.
* அடுத்து ஒரு வாணலியை அடுப்பில் வைத்து, அதில் தாளிப்பதற்கு எண்ணெய் ஊற்றி சூடானதும், கடுகு, உளுத்தம் பருப்பு, கறிவேப்பிலை, வரமிளகாய் சேர்த்து தாளித்து, சட்னியுடன் சேர்த்து கிளறினால், சுவையான வேர்க்கடலை தக்காளி சட்னி தயார்.

Image Courtesy: Apoorvaa's Nalabagam