இந்த 4 பொருள் இருந்தா போதும்.. 1 நிமிடத்தில் சட்னியை செஞ்சுடலாம்.. எப்படி-ன்னு பாருங்க...

Pacha Puli Chutney Recipe In Tamil: காலையில் உங்கள் வீட்டில் இட்லி அல்லது தோசை செய்ய நினைக்கிறீர்களா? அதுவும் சிம்பிளாக, அதே சமயம் செய்வதற்கு சுலபமாகவும், ருசியாகவும் இருக்குமாறு ஒரு சைடு டிஷ் செய்ய நினைக்கிறீர்களா? அப்படியானால் பச்ச புளி சட்னியை செய்யுங்கள்.

இந்த சட்னிக்கு சின்ன வெங்காயம், பச்சை மிளகாய், பூண்டு, புளி ஆகிய 4 பொருட்கள் மட்டும் இருந்தால் போதும். ஒரு நிமிடத்திலேயே சட்னியை செய்து விடலாம். இந்த பச்ச புளி சட்னி புளிப்பும், காரமும் கலந்து இருப்பதால், குழந்தைகள் முதல் பெரியவர்கள் வரை அனைவரும் விரும்பி சாப்பிடக்கூடியவாறு இருக்கும்.

உங்களுக்கு பச்ச புளி சட்னியை எப்படி செய்வதென்று தெரிந்து கொள்ள வேண்டுமா? கீழே பச்ச புளி சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* சின்ன வெங்காயம் - 100 கிராம்
* பூண்டு - 3 பல்
* பச்சை மிளகாய் - 8
* புளி - 1 எலுமிச்சை அளவு
* உப்பு - சுவைக்கேற்ப

தாளிப்பதற்கு...

* நல்லெண்ணெய் - 50 மிலி
* கடுகு - 1/2 டீஸ்பூன்
* உளுத்தம் பருப்பு - 1/2 டீஸ்பூன்
* கறிவேப்பிலை - சிறிது

செய்முறை:

* முதலில் மிக்சர் ஜாரில் சின்ன வெங்காயம், பூண்டு, பச்சை மிளகாய், புளி மற்றும் சுவைக்கேற்ப உப்பு சேர்த்து நன்கு மென்மையாக அரைத்துக் கொள்ள வேண்டும்.
* பின்னர் அரைத்த சட்னியை ஒரு கிண்ணத்தில் போட்டுக் கொள்ள வேண்டும்.
* பின்பு ஒரு வாணலியை அடுப்பில் வைத்து, அதில் நல்லெண்ணெய் ஊற்றி சூடானதும், கடுகு, உளுத்தம் பருப்பு மற்றும் கறிவேப்பிலை சேர்த்து தாளித்து, சட்னியுடன் சேர்த்து கிளறினால், சுவையான பச்ச புளி சட்னி தயார்.

குறிப்பு:

* இந்த சட்னிக்கு நல்லெண்ணெய் தான் ஹைலைட். எனவே நல்லெண்ணெயை அதிகம் சூடேற்றி ஊற்றுங்கள். இதனால் சட்னியின் சுவை இன்னும் அற்புதமாக இருக்கும்.

Image Courtesy: Traditionally Modern Food