வீட்டிலேயே பால் போளி செய்வது எப்படி?

Paal Poli Recipe In Tamil: உங்கள் வீட்டில் உள்ளோர் போளியை விரும்பி சாப்பிடுவார்களா? இதுவரை நீங்கள் வீட்டில் போளி செய்து சுவைத்ததுண்டா? இல்லையென்றால் இன்று மாலை உங்கள் வீட்டில் உள்ளோருக்கு செய்து கொடுங்கள்.

அதுவும் பால் போளியை இன்று செய்யுங்கள். இந்த பால் போளி செய்வது மிகவும் சுலபம். முக்கியமாக இது குழந்தைகள் முதல் பெரியவர்கள் வரை அனைவரும் விரும்பி சாப்பிடும் வகையில் இருக்கும்.

உங்களுக்கு பால் போளி செய்வது எப்படி என்று தெரிந்து கொள்ள வேண்டுமா? கீழே பால் போளி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* மைதா - 1 கப்
* ரவை - 1/4 கப்
* உப்பு - ஒரு சிட்டிகை
* நெய் அல்லது எண்ணெய்
* வெதுவெதுப்பான நீர் - தேவையான அளவு
* எண்ணெய் - பொரிப்பதற்கு தேவையான அளவு
* பால் - 1 1/2 லிட்டர்
* சர்க்கரை - 3/4 கப்
* ஏலக்காய் தூள் - 1/2 டீஸ்பூன்
* குங்குமப்பூ - சிறிது (2 டேபிள் ஸ்பூன் பாலில் ஊற வைக்கவும்)
* முந்திரி - 3 (பொடித்தது)
* பிஸ்தா - சிறிது (பொடித்தது)

செய்முறை:

* முதலில் ஒரு பௌலில் மைதா, ரவை, உப்பு, சிறிது நெய் சேர்த்து கலந்து கொள்ள வேண்டும்.
* பின் மெதுவாக வெதுவெதுப்பான நீரை ஊற்றி பூரி மாவு பதத்திற்கு பிசைந்து, 20 நிமிடம் ஊற வைக்க வேண்டும்.
* பின்பு ஒரு பாத்திரத்தில் பாலை ஊற்றி அடுப்பில் வைத்து, 3/4 அளவு சுண்டும் வரை மிதமான அளவில் வைத்து கொதிக்க வைக்க வேண்டும்.
* பிறகு அதில் ஏலக்காய் தூள், குங்குமப்பூ ஊற வைத்த பால், சர்க்கரை சேர்த்து கிளறி, குறைவான தீயில் வைத்து 5 நிமிடம் கொதிக்க வைத்து இறக்கி, அந்த பாலை ஒரு அகலமான தட்டில் ஊற்றிக் கொள்ள வேண்டும்.
* அடுத்து பிசைந்து வைத்துள்ள மாவை சிறு எலுமிச்சை அளவில் உருண்டைகளாக உருட்டிக் கொள்ள வேண்டும்.
* பின் ஒவ்வொரு உருண்டையையும் எடுத்து, அதை பூரி போன்று தேய்த்துக் கொள்ள வேண்டும்.
* பின்னர் ஒரு வாணலியை அடுப்பில் வைத்து, அதில் பொரிப்பதற்கு தேவையான அளவு எண்ணெய் ஊற்றி சூடானதும், தேய்த்து வைத்துள்ள பூரிகளை ஒவ்வொன்றாக போட்டு பொரித்து எடுத்து, அதை தட்டில் உள்ள பாலில் வைக்க வேண்டும்.
* இதேப் போன்று அனைத்து பூரிகளையும் பொரித்து, பாலில் போட்டு 10-20 நிமிடம் ஊற வைத்து, மேலே முந்திரி மற்றும் பிஸ்தாவைத் தூவினால், சுவையான பால் போளி தயார்.

Image Courtesy: sailusfood