கொங்கு ஸ்பெஷல் மட்டன் தண்ணி குழம்பு ரெசிபி... ஒரு தடவ செஞ்சு பாருங்க... தெருவே மணக்கும்...!

Kongunadu Mutton Thanni Kulambu Recipe in Tamil: சண்டே என்றாலே பெரும்பாலான மக்களுக்கு அசைவம்தான். சொல்லப்போனால் ஞாயிறுக்கிழமை வருவதே பெரும்பாலான மக்களுக்கு அசைவ உணவுகள் சாப்பிடத்தான். அசைவ உணவுகளிலேயே பல வகைகள் உள்ளது. அதேபோல ஒவ்வொரு பிராந்தியத்திற்கும் ஒரு ஸ்பெஷல் உணவு இருக்கும். அந்த வகையில் கொங்கு மண்டலத்தில் மிகவும் பிரபலமான அசைவ உணவுகளில் ஒன்று தண்ணி குழம்பு.

கிட்டத்தட்ட சூப் போல இருக்கும் இந்த குழம்பை நாட்டுக்கோழி மற்றும் மட்டன் இரண்டிலுமே செய்யலாம். இந்த இரண்டுமே முற்றிலும் தனித்துவமான சுவை கொண்டது. இந்த பதிவில் காரசாரமான மட்டன் தண்ணி குழம்பு எப்படி வைக்கலாம் என்று தெரிந்து கொள்ளலாம். இந்த மட்டன் தண்ணி குழம்பை சூடான சாதத்தில் ரசம் போல ஊற்றி சைடிஷாக மட்டன் வறுவல் வைத்து சாப்பிட்டால் சண்டே சந்தோஷமாக நிறைவடையும்.

தேவையானப் பொருட்கள்:

- அரை கிலோ மட்டன்
- 25 சின்ன வெங்காயம்
- 2 ஸ்பூன் தேங்காய் துருவல்
- 10 பல் பூண்டு
- இஞ்சி ஒரு துண்டு
- 2 ஸ்பூன் முழு மல்லி
- 4 வர மிளகாய்
- அரை ஸ்பூன் சீரகம்
- 1 ஸ்பூன் மிளகு
- 1 ஸ்பூன் சோம்பு
- அரை ஸ்பூன் கசகசா
- கறிவேப்பிலை ஒரு கொத்து
- 2 பட்டை
- 4 கிராம்பு
- 2 ஏலக்காய்
- சிறிது கல்பாசி
- தேவையான அளவு உப்பு
- தேவையான அளவு எண்ணெய்
- கொத்தமல்லி சிறிதளவு

செய்முறை:

- ஒரு கடாயில் முழு மல்லி, வர மிளகாய், சோம்பு ,சீரகம், மிளகு, பட்டை ,லவங்கம், ஏலக்காய் ,கல்பாசி, கறிவேப்பிலை, கசகசா சேர்த்து வறுத்து எடுத்துக் கொள்ளவும்

- அதே கடாயில் சிறிதளவு எண்ணெய் சேர்த்து தேங்காய் துருவல் 20 சின்ன வெங்காயம் சேர்த்து வதக்கிய பின் இஞ்சி பூண்டு சேர்த்து வதக்கி எடுத்துக் கொள்ளவும்

- பின்னர் மிக்ஸி ஜாரில் வதக்கிய மசாலாவை தண்ணீர் சேர்த்து நைசாக அரைத்து எடுத்துக் கொள்ளவும்

- குக்கரில் 2 ஸ்பூன் எண்ணெய் ஊற்றி சூடானதும் சின்ன வெங்காயம் கறிவேப்பிலை சேர்த்து வதக்கிக் கொள்ளவும்

- வெங்காயம் வதங்கிய பின் மட்டன் மஞ்சத்தூள் சேர்த்து பத்து நிமிடம் வதக்கி கொள்ளவும்.

- மட்டன் நன்கு வதங்கியதும் அதில் அரைத்து வைத்திருந்த மசாலாப் பொருட்களை சேர்த்து தேவையான அளவு தண்ணீர் உப்பு சேர்த்து குக்கர் க்ளோஸ் செய்து ஆறு விசில் வரும்வரை வேக வைக்கவும்.

- குக்கர் விசில் அடங்கியதும் மூடியைத் திறந்து கொத்தமல்லி தூவி இறக்கினால் சூப்பரான மட்டன் தண்ணி குழம்பு ரெடி.