ஒரு கப் முருங்கைக்கீரை இருந்தா போதும்.. சுவையான துவையலை செய்யலாம்.. எப்படி-ன்னு பாருங்க..

Murungai Keerai Thogayal Recipe: இன்று இரவு உங்கள் வீட்டில் இட்லி, தோசை செய்ய போகிறீர்களா? அதற்கு ஒரு சத்தான மற்றும் சுவையான சைடு டிஷ் செய்ய நினைக்கிறீர்களா? அதுவும் இதுவரை வீட்டில் முயற்சிக்காத ஒரு சைடு டிஷ் செய்ய விரும்புகிறீர்களா?

உங்கள் வீட்டில் முருங்கைக்கீரை உள்ளதா? அப்படியானால் அதைக் கொண்டு துவையல்/சட்னி செய்யுங்கள். இந்த முருங்கைக்கீரை துவையல் இட்லி, தோசைக்கு மட்டுமின்றி, சாதத்துடன் சாப்பிடவும் நன்றாக இருக்கும்.

முக்கியமாக இந்த முருங்கைக்கீரை துவையல் அலுவலகம் முடிந்து வீட்டிற்கு வந்ததும், எளிதில் செய்யக்கூடிய வகையில் இருக்கும். உங்களுக்கு முருங்கைக்கீரை துவையலை எப்படி செய்வதென்று தெரிந்து கொள்ள வேண்டுமா?

கீழே முருங்கைக்கீரை துவையல் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* முருங்கைக்கீரை - 1 கப்
* எண்ணெய் - 2 டீஸ்பூன்
* உளுத்தம் பருப்பு - 1/2 டீஸ்பூன்
* சீரகம் - 1/4 டீஸ்பூன்
* பச்சை மிளகாய் - 3
* துருவிய தேங்காய் - 1 கப்
* உப்பு - சுவைக்கேற்ப
* புளி - 1 சிறிய துண்டு
* தண்ணீர் - தேவையான அளவு

செய்முறை:

* முதலில் சுத்தம் செய்த முருங்கைக்கீரையை நீரில் கழுவி, அதை ஒரு துணியில் போட்டு உலர்த்த வேண்டும்.
* பின்னர் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், உளுத்தம் பருப்பு, சீரகம் சேர்த்து தாளிக்க வேண்டும்.
* பின்பு அதில் பச்சை மிளகாய் சேர்த்து வதக்க வேண்டும்.
* பிறகு முருங்கைக் கீரையை சேர்த்து 2 நிமிடம் பச்சை வாசனை போக வதக்க வேண்டும்.
* அடுத்து, அதில் துருவிய தேங்காயை சேர்த்து, சுவைக்கேற்ப உப்பு சேர்த்து நன்கு வதக்க வேண்டும்.
* பின் அதில் புளியை சேர்த்து கிளறி, இறக்கி குளிர வைக்க வேண்டும்.
* பின்பு மிக்சர் ஜாரில் வதக்கிய பொருட்கள் அனைத்தையும் சேர்த்து, சிறிது நீரை ஊற்றி நன்கு மென்மையாக அரைத்தால், சுவையான மற்றும் சத்தான முருங்கைக்கீரை துவையல் தயார்.

Image Courtesy: pallavibhat