1 கப் பாசிப்பருப்பு இருந்தா.. ஈவ்னிங் டைம்-ல இப்படி ஸ்நாக்ஸ் செய்யுங்க.. ருசியானதும், சத்தானதும் கூட..

Moongdal Sweet Paniyaram Recipe In Tamil: மாலை வேளையில் உங்கள் பிள்ளைகள் சாப்பிட ஸ்வீட் ஏதாவது செய்து கொடுக்க கேட்கிறார்களா? அப்போது அவர்களுக்கு சத்தான அதே சமயம் சுவையான ஸ்நாக்ஸ் செய்து கொடுக்க நினைக்கிறீர்களா? உங்கள் வீட்டில் 1 கப் பாசிப்பருப்பு உள்ளதா? அப்படியானால் அந்த பாசிப்பருப்பைக் கொண்டு அருமையான சுவையில் பணியாரம் செய்து கொடுங்கள். இந்த பாசிப்பருப்பு பணியாரம் செய்வதற்கு சுலபமாக இருப்பதோடு, குழந்தைகள் முதல் பெரியவர்கள் வரை அனைவரும் விரும்பி சாப்பிடக்கூடியவாறு இருக்கும்.

உங்களுக்கு இந்த பாசிப்பருப்பு இனிப்பு பணியாரத்தை எப்படி செய்வதென்று தெரிந்து கொள்ள வேண்டுமா? கீழே பாசிப்பருப்பு இனிப்பு பணியாரம் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* பாசிப்பருப்பு - 1 கப்
* தண்ணீர் - சிறிது
* நாட்டுச்சர்க்கரை - 3/4 கப்
* துருவிய தேங்காய் - 1/2 கப்
* ஏலக்காய் தூள் - 1/4
* உப்பு - 1 சிட்டிகை
* ஆப்ப சோடா - 1/4 டீஸ்பூன்
* நல்லெண்ணெய் - தேவையான அளவு

செய்முறை:

* முதலில் பாசிப்பருப்பை நீரில் 2 முறை கழுவிவிட்டு, பின் நீரை ஊற்றி 2 மணிநேரம் ஊற வைத்துக் கொள்ள வேண்டும்.
* 2 மணிநேரம் கழித்து பாசிப்பருப்பில் உள்ள நீரை வடிகட்டிவிட்டு, மிக்சர் ஜாரில் சேர்த்து, வேண்டுமானால் சிறிது நீரை ஊற்றி நன்கு மென்மையாக அரைத்துக் கொள்ள வேண்டும்.
* பின்பு அதில் நாட்டுச்சர்க்கரை மற்றும் துருவிய தேங்காயை சேர்த்து நன்கு மென்மையாக அரைத்துக் கொள்ள வேண்டும்.
* பிறகு ஒரு பாத்திரத்தில் அரைத்த மாவை எடுத்துக் கொண்டு, ஜாரில் 1/2 கப் நீரை ஊற்றி, தோசை மாவு பதத்திற்கு கலந்து கொள்ள வேண்டும்.
* பின் அத்துடன் ஏலக்காய் தூள், உப்பு மற்றும் ஆப்ப சோடாவை சேர்த்து நன்கு கலந்து கொள்ள வேண்டும்.
* இறுதியாக பணியாரக் கல்லை அடுப்பில் வைத்து, அதன் குழிகளில் நல்லெண்ணெயை கொஞ்சமாக ஊற்றி, பின் கலந்து வைத்துள்ள மாவை குழிகளில் ஊற்றி, மூடி வைத்து 2-3 நிமிடம் வேக வைக்க வேண்டும்.
* பின் மூடியைத் திறந்து, பணியாரத்தை திருப்பிப் போட்டு, மீண்டும் 2-3 நிமிடம் வேக வைத்து எடுத்தால், சுவையான மற்றும் சத்தான பாசிப்பருப்பு இனிப்பு பணியாரம் தயார்.