புதினா சட்னியை ஒருடைம் இப்படி செஞ்சு பாருங்க.. வீட்டுல எல்லாரும் 2 இட்லி எக்ஸ்ட்ரா சாப்பிடுவாங்க..

Pudina Chutney Without Coconut Recipe In Tamil: காலையில் உங்கள் வீட்டில் இட்லி செய்யப் போகிறீர்களா? இட்லி என்றாலே உங்கள் வீட்டில் சட்னி தான் செய்வீர்களா? பொதுவாக சட்னி என்றாலே அதில் தேங்காய் சேர்ப்பது வழக்கம். ஆனால் தேங்காய் சேர்க்காமலேயே நிறைய சட்னியை செய்யலாம்.

அதுவும் வீட்டில் புதினா இருந்தால், அந்த புதினா சட்னியை தேங்காய் சேர்க்காமலேயே அட்டகாசமான சுவையில் செய்யலாம். இப்படி தேங்காய் சேர்க்காமல் செய்யும் புதினா சட்னியை செய்தால், வீட்டில் உள்ளோர் வழக்கமாக சாப்பிடுவதை விட சற்று அதிகமாக சாப்பிடுவார்கள்.

உங்களுக்கு தேங்காய் சேர்க்காமல் புதினா சட்னியை எப்படி செய்வதென்று தெரிந்து கொள்ள வேண்டுமா? கீழே தேங்காய் சேர்க்காமல் செய்யும் புதினா சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

வறுத்து அரைப்பதற்கு...

* நல்லெண்ணெய் - 1/2 டேபிள் ஸ்பூன்
* உளுத்தம் பருப்பு - 1 டேபிள் ஸ்பூன்
* பாதாம் - 6
* வெங்காயம் - 1
* வரமிளகாய் - 2
* வறுத்த வேர்க்கடலை - 1 டேபிள் ஸ்பூன்
* புளி - சிறிய துண்டு
* பெருங்காயத் தூள் - 1/4 டீஸ்பூன்
* கொத்தமல்லி - சிறிது
* புதினா - 1 கட்டு
* மஞ்சள் தூள் - 1 சிட்டிகை
* உப்பு - சுவைக்கேற்ப
* தண்ணீர் - தேவையான அளவு

தாளிப்பதற்கு...

* நல்லெண்ணெய் - 1 டீஸ்பூன்
* கடுகு - 1/2 டீஸ்பூன்
* உளுத்தம் பருப்பு - 1 டேபிள் ஸ்பூன்
* வரமிளகாய் - 1
* கறிவேப்பிலை - 1 கொத்து

செய்முறை:

* முதலில் ஒரு வாணலியை அடுப்பில் வைத்து, அதில் நல்லெண்ணெய் ஊற்றி சூடானதும், உளுத்தம் பருப்பு, பாதாம் சேர்த்து நன்கு வறுக்க வேண்டும்.
* அதன் பின் அதில் நறுக்கிய வெங்காயம், வரமிளகாய் சேர்த்து, வெங்காயத்தை கண்ணாடி பதத்திற்கு வரும் வரை வதக்க வேண்டும்.
* பின்பு அதில் வறுத்த வேர்க்கடலை, புளி, பெருங்காயத் தூள் சேர்த்து வறுக்க வேண்டும்.
* பிறகு அதில் சிறிது கொத்தமல்லி மற்றும் 1 கட்டு புதினாவை சேர்த்து, மஞ்சள் தூள் மற்றும் சுவைக்கேற்ப உப்பு சேர்த்து, புதினா சுருங்கும் வரை வதக்கி இறக்கி குளிர வைக்க வேண்டும்.
* பின்னர் மிக்சர் ஜாரில் வதக்கிய பொருட்களை சேர்த்து, சிறிது நீரை ஊற்றி நன்கு அரைத்துக் கொள்ள வேண்டும்.
* பின் அரைத்த சட்னியை ஒரு கிண்ணத்தில் போட்டு, சிறிது நீரை ஊற்றி கலந்து கொள்ள வேண்டும்.
* இறுதியாக ஒரு வாணலியை அடுப்பில் வைத்து, அதில் 1/2 டீஸ்பூன் நல்லெண்ணெய் ஊற்றி சூடானதும், கடுகு, உளுத்தம் பருப்பு, வரமிளகாய், கறிவேப்பிலை சேர்த்து தாளித்து, சட்னியுடன் சேர்த்து கிளறினால், சுவையான புதினா சட்னி தயார்.