மீல் மேக்கர் ப்ரை

மாலை வேளையில் பள்ளி முடிந்து பசியுடன் வரும் குழந்தைகள் வீட்டிற்கு வந்ததும் சாப்பிட ஏதாவது கேட்பார்கள். அப்படி கேட்கும் போது, அவர்களுக்கு ஒரு சுவையான மற்றும் மொறுமொறுப்பான ஸ்நாக்ஸ் செய்து கொடுக்க நினைத்தால், மீல் மேக்கர் ப்ரை செய்து கொடுங்கள். இந்த மீல் மேக்கர் ப்ரை காபி, டீ குடிக்கும் போது சாப்பிட அற்புதமாக இருக்கும். மேலும் இதை வீட்டிற்கு விருந்தினர்கள் வந்திருக்கும் போதும் செய்து கொடுக்கலாம்.

உங்களுக்கு மீல் மேக்கர் ப்ரை எப்படி செய்வதென்று தெரிந்து கொள்ள வேண்டுமா? கீழே மீல் மேக்கர் ப்ரை ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* மீல் மேக்கர் - 2 கப் (வேக வைத்தது)

* மிளகாய் தூள் - 2 டீஸ்பூன்

* கரம் மசாலா - 1 டீஸ்பூன்

* உப்பு - சுவைக்கேற்ப

* கறிவேப்பிலை - சிறிது

* கொத்தமல்லி - சிறிது

* இஞ்சி பூண்டு பேஸ்ட் - 1 டேபிள் ஸ்பூன்

* அரிசி மாவு - 4 டேபிள் ஸ்பூன்

* எண்ணெய் - பொரிப்பதற்கு தேவையான அளவு

செய்முறை:

* முதலில் மீல் மேக்கரை சுடுநீரில் போட்டு ஒரு கொதி விட்டு இறக்கி, 10 நிமிடம் மூடி வைத்து, பின் மூடியைத் திறந்து, நீரை வடிகட்டிவிட்டு, மீல் மேக்கரில் உள்ள அதிகப்படியான நீரை பிழிந்து விட வேண்டும்.

* பின்பு அந்த மீல் மேக்கரை மிக்சர் ஜாரில் போட்டு அரைத்துக் கொள்ள வேண்டும்.

* பிறகு அதில் எண்ணெயைத் தவிர, மற்ற அனைத்து பொருட்களையும் போட்டு ஒருமுறை அரைத்துக் கொள்ள வேண்டும்.

* பின் அரைத்ததை ஒரு பாத்திரத்தில் எடுத்துக் கொள்ள வேண்டும்.

* அடுத்து அரைத்ததை சிறு சிறு உருண்டைகளாக உருட்டிக் கொள்ள வேண்டும்.

* பின்னர் ஒரு வாணலியை அடுப்பில் வைத்து, அதில் பொரிப்பதற்கு தேவையான அளவு எண்ணெய் ஊற்றி சூடேற்ற வேண்டும்.

* எண்ணெய் சூடானதும், உருட்டிய உருண்டைகளை அதில் போட்டு பொன்னிறமாக பொரித்து எடுத்தால், சுவையான மீல் மேக்கர் ப்ரை தயார்.

Image Courtesy: yummytummyaarthi