வீட்டுல ஒரு ஆளுக்கு மட்டும் என்ன சமைக்குறதுன்னு தெரியலையா? அப்ப இந்த மசாலா முட்டை செய்யுங்க..

Masala Egg Soya Recipe In Tamil: மதியம் சிம்பிளா சமைக்க நினைக்கிறீங்களா? அதுவும் வீட்டில் ஒரு ஆளுக்கு மட்டும் என்ன சமைத்து சாப்பிடுவது என்று யோசிக்கிறீர்களா? வீட்டில் முட்டையும், மீல் மேக்கரும் உள்ளதா? அப்படியானால் அவற்றைக் கொண்டு நாவிற்கு விருந்தளிக்கும் வகையில் மசாலா முட்டை சோயாவை செய்து சாப்பிடுங்கள்.

அதுவும் நல்ல சூடான சாதத்துடன் இந்த மசாலாவை சேர்த்து சாப்பிடும் போது ருசி அவ்வளவு பிரமாதமாக இருக்கும். முக்கியமாக டக்கென்று ஒரு சமையலை செய்ய நினைத்தால், இதை செய்யலாம். அந்த அளவில் செய்வதற்கு சுலபமாகவும் இருக்கும்.

உங்களுக்கு மசாலா முட்டை சோயாவை எப்படி செய்வதென்று தெரிந்து கொள்ள வேண்டுமா? கீழே மசாலா முட்டை சோயாவின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* முட்டை - 3
* மீல் மேக்கர் - 1 கப்
* எண்ணெய் - 2 டேபிள் ஸ்பூன்
* மஞ்சள் தூள் - 1/2 டீஸ்பூன்
* மிளகாய் தூள் - 1 டீஸ்பூன்
* மல்லித் தூள் - 1 டீஸ்பூன்
* மிளகுத் தூள் - 1/2 டீஸ்பூன்
* உப்பு - சுவைக்கேற்ப
* சின்ன வெங்காயம் - 1/2 கப் (இடித்துக் கொள்ளவும்)
* பூண்டு - 6 பல் (இடித்துக் கொள்ளவும்)
* பச்சை மிளகாய் - 2 (இடித்துக் கொள்ளவும்)
* தண்ணீர் - 2-3 டேபிள் ஸ்பூன்

செய்முறை:

* முதலில் ஒரு வாணலியை அடுப்பில் வைத்து, அதில் 1 டேபிள் ஸ்பூன் எண்ணெய் ஊற்றி சூடானதும், 3 முட்டைகளை உடைத்து ஊற்றி, புர்ஜி போன்று வதக்கி, ஒரு தட்டில் எடுத்து வைத்துக் கொள்ள வேண்டும்.
* பின் அதே வாணலியில் ஊற வைத்த மீல் மேக்கரை சேர்த்து ரோஸ்ட் செய்து அதையும் ஒரு தட்டில் எடுத்து வைத்துக் கொள்ள வேண்டும்.
* பின்பு அதே வாணலியில் 1 டேபிள் ஸ்பூன் எண்ணெய் ஊற்றி சூடானதும், மஞ்சள் தூள், மிளகாய் தூள், மல்லித் தூள், மிளகுத் தூள் மற்றும் சுவைக்கேற்ப உப்பு சேர்த்து குறைவான தீயில் வைத்து நன்கு கிளறி விட வேண்டும்.
* பிறகு அதில் இடித்து வைத்துள்ள சின்ன வெங்காயம், பூண்டு மற்றும் பச்சை மிளகாயை சேர்த்து வதக்கி, வெங்காயம் நன்கு வதங்கி பொன்னிறமானதும், அதில் 2-3 டேபிள் ஸ்பூன் நீரை ஊற்றி கிளறி, மசாலா நன்கு கொதித்ததும், அதில் வதக்கி வைத்துள்ள முட்டை புர்ஜி மற்றும் மீல் மேக்கரை சேர்த்து நன்கு கிளறி, 2-3 நிமிடம் வேக வைத்து இறக்கினால், சுவையான மசாலா முட்டை சோயா தயார்.