மஞ்சள் பூசணியை இந்த மாதிரி பொரியல் செய்யுங்க.. பிடிக்காதவங்களும் கேட்டு விரும்பி சாப்பிடுவாங்க..

Manjal Poosanikai Poriyal Recipe In Tamil: தற்போது மஞ்சள் பூசணி சீசன் என்பதால் மார்கெட்டுகளில் இந்த காயை அதிகம் காணலாம். மஞ்சள் பூசணி ஏராளமான நுண்சத்துக்களைக் கொண்டது. இந்த சீசன் இருக்கும் போதே அடிக்கடி வாங்கி சமைத்து சாப்பிடுங்கள்.

ஆனால் உங்கள் வீட்டில் உள்ளோர் மஞ்சள் பூசணியை விரும்பமாட்டார்களா? இதற்கு அதன் இனிப்புச் சுவை தான் காரணமா? அப்படியானால் மஞ்சள் பூசணியை இந்த பக்குவத்தில் பொரியல் செய்யுங்கள். இப்படி பொரியல் செய்யும் போது, அனைத்து விதமான உணவுகளுடனும் சேர்த்து சாப்பிடக்கூடியவாறு இருக்கும். மேலும் பிடிக்காதவர்களும் கேட்டு விரும்பி சாப்பிடுவார்கள்.

உங்களுக்கு மஞ்சள் பூசணி பொரியலை எப்படி செய்வதென்று தெரிந்து கொள்ள வேண்டுமா? கீழே மஞ்சள் பூசணி பொரியல் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* மஞ்சள் பூசணிக்காய் - 400 கிராம்
* எண்ணெய் - 1 டேபிள் ஸ்பூன்
* கடுகு - 1 டீஸ்பூன்
* உளுத்தம் பருப்பு - 1 டீஸ்பூன்
* கறிவேப்பிலை - 1 கொத்து
* வரமிளகாய் - 2
* பச்சை மிளகாய் - 3
* சின்ன வெங்காயம் - 12 (பொடியாக நறுக்கியது)
* உப்பு - சுவைக்கேற்ப
* தண்ணீர் - 2 கைப்பிடி
* துருவிய தேங்காய் - 1 கைப்பிடி

செய்முறை:

* முதலில் மஞ்சள் பூசணியின் தோல் மற்றும் விதைகளை நீக்கிவிட்டு, சதுரத் துண்டுகளாக வெட்டிக் கொள்ள வேண்டும்.
* பின்னர் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், கடுகு, உளுத்தம் பருப்பு, கறிவேப்பிலை சேர்த்து தாளிக்க வேண்டும்.
* பின்பு அதில் வரமிளகாய் மற்றும் நறுக்கிய பச்சை மிளகாயை சேர்த்து நன்கு வதக்க வேண்டும்.
* அடுத்து அதில் பொடியாக நறுக்கிய சின்ன வெங்காயத்தை சேர்த்து நன்கு கண்ணாடி பதத்திற்கு வரும் வரை வதக்க வேண்டும்.
* பிறகு நறுக்கி வைத்துள்ள பூசணிக்காயை சேர்த்து 2 நிமிடம் வதக்க வேண்டும்.
* பின் தேவையான அளவு உப்பு சேர்த்து கிளறி விட வேண்டும். உப்பு சேர்க்கும் போது வழக்கமாக மற்ற காய்களுக்கு சேர்ப்பதை விட குறைவாக சேர்க்க வேண்டும்.
* அதன் பின் அதில் 2 கைப்பிடி நீரை தெளித்து கிளறி, மூடி வைத்து மிதமான தீயில் வைத்து 8 நிமிடம் வேக வைக்க வேண்டும்.
* 8 நிமிடம் கழித்து மூடியைத் திறந்து கிளறி, துருவிய தேங்காயை சேர்த்து 1 நிமிடம் கிளறி இறக்கினால், சுவையான மஞ்சள் பூசணிக்காய் பொரியல் தயார்.