மணமணக்கும்... மதுரை வெஜ் சுக்கா - எப்படி செய்றது-ன்னு பாத்து ஒருவாட்டி ட்ரை பண்ணுங்க...

Madurai Veg Sukka Recipe In Tamil: மதியம் உங்கள் வீட்டில் சாம்பார் செய்துள்ளீர்களா? அதற்கு ஒரு அருமையான சைடு டிஷ் செய்ய நினைக்கிறீர்களா? உங்கள் வீட்டில் உருளைக்கிழங்கு, மொச்சை, மீல் மேக்கர் போன்றவை உள்ளதா? அப்படியானால் அவற்றை கொண்டு மதுரை நான்வெஜ் சுக்கா ஸ்டைலில் வெஜ் சுக்கா செய்யுங்கள்.

இந்த வெஜ் சுக்கா சாம்பார் சாதம், ரசம் சாதம் போன்றவற்றுடன் சேர்த்து சாப்பிட அருமையாக இருக்கும். அதோடு இந்த சுக்கா செய்வதற்கு மிகவும் சுலபமாகவும் இருக்கும். ஒருமுறை இந்த சுக்காவை செய்தால், பின் அடிக்கடி செய்து கொடுக்குமாறு கேட்பார்கள்.

உங்களுக்கு மதுரை வெஜ் சுக்காவை எப்படி செய்வதென்று தெரிந்து கொள்ள வேண்டுமா? கீழே மதுரை வெஜ் சுக்கா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எண்ணெய் - 2 1/2 டேபிள் ஸ்பூன்
* உருளைக்கிழங்கு - 2 (வேக வைத்தது)
* மீல் மேக்கர் - 100 கிராம் (சுடுநீரில் ஊற வைத்து எடுத்தது)
* மொச்சை பயறு - 100 கிராம் (வேக வைத்தது)
* பூண்டு - 7-8
* சோம்பு - 1/2 டீஸ்பூன்
* சின்ன வெங்காயம் - 100 கிராம் (நறுக்கியது)
* வெங்காயம் - 1 (பொடியாக நறுக்கியது)
* கறிவேப்பிலை - 1 கொத்து
* தக்காளி - 1
* இஞ்சி பூண்டு பேஸ்ட் - 1 டீஸ்பூன்
* மஞ்சள் தூள் - 1/4 டீஸ்பூன்
* மிளகாய் தூள் - 1 டீஸ்பூன்
* சுடுதண்ணீர் - சிறிது
* உப்பு - சுவைக்கேற்ப
* சுக்கா மசாலா - 1 டேபிள் ஸ்பூன்
* கொத்தமல்லி - சிறிது

செய்முறை:

* முதலில் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், தட்டி வைத்துள்ள பூண்டு மற்றும் சோம்பை சேர்த்து நன்கு வதக்க வேண்டும்.
* பின் அதில் நறுக்கிய சின்ன வெங்காயம் மற்றும் பெரிய வெங்காயத்தை சேர்த்து, கறிவேப்பிலை தூவி, நன்கு கண்ணாடி பதத்திற்கு வரும் வரை வதக்க வேண்டும்.
* அடுத்து அதில் நறுக்கிய தக்காளியை சேர்த்து வதக்க வேண்டும்.
* அதன் பின் அதில் இஞ்சி பூண்டு பேஸ்ட்டை சேர்த்து நன்கு பச்சை வாசனை போக வதக்க வேண்டும்.
* பின்பு அதில் மஞ்சள் தூள், மிளகாய் தூள் சேர்த்து கிளறி சிறிது சுடுநீரை ஊற்றி, சுவைக்கேற்ப உப்பு சேர்த்து நன்கு பச்சை வாசனை போகும் வரை கொதிக்க வைக்க வேண்டும்.
* பிறகு அதில் வேக வைத்துள்ள உருளைக்கிழங்கு, மொச்சை மற்றும் மீல் மேக்கரை சேர்த்து நன்கு கிளறி விட்டு 2 நிமிடம் வேக வைக்க வேண்டும்.
* இறுதியாக அதில் சுக்கா மசாலாவை சேர்த்து நன்கு பிரட்டி, மூடி வைத்து மிதமான தீயில் வைத்து 5 நிமிடம் வேக வைத்து இறக்கி, கொத்தமல்லியைத் தூவி கிளறினால், சுவையான மதுரை வெஜ் சுக்கா தயார்.