காரசாரமான.. மதுரை பெப்பர் சிக்கன் கிரேவி - எப்படி செய்றது-ன்னு பாத்து ஒருவாட்டி ட்ரை பண்ணி பாருங்க..

Madurai Pepper Chicken Gravy In Tamil: இந்த வார விடுமுறையில் உங்கள் வீட்டில் சிக்கன் வாங்க போகிறீர்களா? அந்த சிக்கனை வாய்க்கு ருசியாக, அதே சமயம் இதுவரை நீங்கள் வீட்டில் செய்திராத ஒரு ரெசிபியை செய்ய நினைக்கிறீர்களா? அப்படியானால் மதுரை பெப்பர் சிக்கன் கிரேவியை செய்யுங்கள்.

இந்த பெப்பர் சிக்கன் கிரேவி சப்பாத்தி, பூரி, சாதம் என அனைத்துடனும் சேர்த்து சாப்பிட அற்புதமாக இருக்கும். முக்கியமாக இந்த கிரேவி செய்வதற்கு மிகவும் ஈஸியாக இருக்கும். சளி பிடித்திருக்கும் போது, இந்த மதுரை பெப்பர் சிக்கன் கிரேவியை செய்து சாப்பிட்டால், நல்ல நிவாரணம் கிடைக்கும்.

உங்களுக்கு மதுரை பெப்பர் சிக்கன் கிரேவியை எப்படி செய்வதென்று தெரிந்து கொள்ள வேண்டுமா? கீழே மதுரை பெப்பர் சிக்கன் கிரேவி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எலும்பில்லாத சிக்கன் - 1 கிலோ (சிறு துண்டுகளாக்கப்பட்டது)
* சின்ன வெங்காய பேஸ்ட் - 200 கிராம்
* தக்காளி பேஸ்ட் - 200 கிராம்
* இஞ்சி பேஸ்ட் - 75 கிராம்
* பூண்டு பேஸ்ட் - 7 கிராம்
* பச்சை மிளகாய் - 2
* சோம்பு - 1 டேபிள் ஸ்பூன்
* மஞ்சள் தூள் - 1/4 டீஸ்பூன்
* மிளகாய் தூள் - 1 டீஸ்பூன்
* மல்லித் தூள் - 1 1/2 டீஸ்பூன்
* சீரகத் தூள் - 25 கிராம்
* மிளகுத் தூள் - 50 கிராம்
* உப்பு - சுவைக்கேற்ப
* கொத்தமல்லி - சிறிது
* புதினா - சிறிது
* கறிவேப்பிலை - சிறிது
* கடலை எண்ணெய் - 200 மிலி
* நெய் - 2 டேபிள் ஸ்பூன்

செய்முறை:

* முதலில் ஒரு வாணலியை அடுப்பில் வைத்து, அதில் கடலை எண்ணெய் ஊற்றி சூடானதும், சோம்பு சேர்த்து தாளிக்க வேண்டும்.
* அதன் பின் அதில் அரைத்த சின்ன வெங்காய பேஸ்ட், கீறிய பச்சை மிளகாய், கறிவேப்பிலை சேர்த்து நன்கு வெங்காயத்தின் பச்சை வாசனை போக வதக்க வேண்டும்.
* அடுத்து அதில் அரைத்த தக்காளியை சேர்த்து நன்கு வதக்க வேண்டும்.
* பின்பு அதில் இஞ்சி மற்றும் பூண்டு பேஸ்ட் சேர்த்து நன்கு பச்சை வாசனை போக வதக்க வேண்டும்.
* பிறகு அதில் மஞ்சள் தூள், மிளகாய் தூள், மல்லித் தூள் சேர்த்து நன்கு வதக்க வேண்டும்.
* பின்னர் அதில் கழுவி வைத்துள்ள சிக்கனை சேர்த்து நன்கு கிளறி விட வேண்டும்.
* அதன் பின் அதில் சுவைக்கேற்ப உப்பு சேர்த்து, சிறிது நீரை ஊற்றி நன்கு கிளறி விட வேண்டும்.
* கிரேவி நன்கு கொதித்து, சிக்கன் வெந்ததும், அதில் சீரகத் தூள் மற்றும் மிளகுத் தூள் சேர்த்து நன்கு கிளறி, 2 நிமிடம் நன்கு வேக வைக்க வேண்டும்.
* இறுதியாக அதில் கொத்தமல்லி, புதினாவை சேர்த்து கிளறி இறக்கி, நெய் ஊற்றி கிளறினால், சுவையான மதுரை பெப்பர் சிக்கன் கிரேவி தயார்.