மீந்து போன பொரி இருக்கா? அப்ப அத தூக்கி போடாம.. இப்படி ஸ்வீட் செய்யுங்க.. வீட்டுல விரும்பி சாப்பிடுவாங்க..

Pori Laddu Recipe In Tamil: ஆயுத பூஜைக்கு வாங்கிய பொரி அதிகமா இருக்கா? அதை காலி பண்ண முடியலையா? அப்படியானால் அதிகமா இருக்குற பொரிய தூக்கி போடாம, அதை வெச்சு ஒரு சுவையான ஸ்வீட் செய்யுங்கள். அது தான் பொரி லட்டு. இப்படி பொரியைக் கொண்டு லட்டு செய்யும் போது, அது ருசியாக இருப்பதால், நொடியில் காலியாகிவிடும்.

முக்கியமாக இந்த பொரி லட்டு செய்வது மிகவும் சுலபம் மற்றும் இதை செய்வதற்கு வீட்டில் உள்ள ஒருசில பொருட்களே போதுமானது. குறிப்பாக இந்த பொரி லட்டு குழந்தைகள் விரும்பி சாப்பிடக்கூடியவாறு மிகவும் சுவையாக இருக்கும்.

உங்களுக்கு பொரி லட்டு ரெசிபியை எப்படி செய்வதென்று தெரிந்து கொள்ள வேண்டுமா? கீழே பொரி லட்டு ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* பொரி - 1 கப்
* தேங்காய் - 1/4 மூடி
* வேர்க்கடலை - 1/4 கப்
* ஏலக்காய் - 2
* வெல்லம் - சுவைக்கேற்ப

செய்முறை:

* முதலில் பூஜைக்கு வாங்கிய மீந்து போன பொரியை மிக்சர் ஜாரில் போட்டு ஒருமுறை அரைத்து பொடித்துக் கொள்ள வேண்டும்.
* பின்னர் அத்துடன் 1/4 மூடி துருவிய தேங்காயை சேர்க்க வேண்டும்.
* பின்பு வறுத்த வேர்க்கடலையை 1/4 கப் சேர்க்க வேண்டும்.
* அடுத்து நல்ல மணத்திற்கு 2 ஏலக்காயை சேர்க்க வேண்டும்.
* பின் சுவைக்கேற்ப வெல்லத்தை சேர்த்து, நன்கு அரைத்துக் கொள்ள வேண்டும்.
* பிறகு அரைத்ததை ஒரு கிண்ணத்தில் எடுத்துக் கொண்டு, அதை சிறு சிறு உருண்டைகளாக லட்டு போன்று பிடித்து வைத்தால், சுவையான பொரி லட்டு தயார்.