மதியம் சாதத்துக்கு எப்பவும் சாம்பார், குழம்பு செய்யாம.. கொத்தமல்லியை இப்படி செஞ்சு சாப்பிடுங்க..

Kothamalli Thokku Recipe In Tamil: மதிய வேளையில் எப்போதும் சாம்பார், குழம்பு செய்து போரத்துவிட்டதா? சிம்பிளாக ஏதாவது செய்து சாப்பிட நினைக்கிறீர்களா? உங்கள் வீட்டில் கொத்தமல்லி, புதினா உள்ளதா? அப்படியானால் அவற்றைக் கொண்டு அட்டகாசமான சுவையில் தொக்கு செய்யுங்கள்.

இந்த கொத்தமல்லி தொக்கு சாதத்துடன் மட்டுமின்றி, இட்லி, தோசையுடன் சாப்பிடவும் நன்றாக இருக்கும். மேலும் இது செய்வதற்கு மிகவும் சுலபமாகவும் இருக்கும். முக்கிமாக ஒருமுறை இந்த தொக்கு செய்தால், 1 வாரம் வரை வைத்து சாப்பிடலாம்.

உங்களுக்கு கொத்தமல்லி தொக்கு எப்படி செய்வதென்று தெரிந்து கொள்ள வேண்டுமா? கீழே கொத்தமல்லி தொக்கு ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

பொடி செய்வதற்கு...

* மிளகு - 1 டீஸ்பூன்
* வெந்தயம் - 1/2 டீஸ்பூன்
* கடுகு - 1/2 டீஸ்பூன்

அரைப்பதற்கு...

* எண்ணெய் - 1 டேபிள் ஸ்பூன்
* கறிவேப்பிலை - 1 கைப்பிடி
* கொத்தமல்லி - 1 கட்டு
* புதினா - 1 கட்டு

தாளிப்பதற்கு...

* நல்லெண்ணெய் - 4 டேபிள் ஸ்பூன்
* கடுகு - 1 டீஸ்பூன்
* பூண்டு - 20 பல்
* வரமிளகாய் - 5
* புளி - 1 எலுமிச்சை அளவு (நீரில் ஊற வைத்து சாறு எடுத்துக் கொள்ளவும்)
* மிளகாய் தூள் - 2 டீஸ்பூன்
* மல்லத் தூள் - 2 டீஸ்பூன்
* உப்பு - சுவைக்கேற்ப
* வெல்லம் - சிறிது

செய்முறை:

* முதலில் ஒரு வாணலியை அடுப்பில் வைத்து, அதில் மிளகு, வெந்தயம், கடுகு சேர்த்து, பொன்னிறமாக வறுத்து இறக்கி குளிர வைத்து, மிக்சர் ஜாரில் போட்டு அரைத்து பொடி செய்து கொள்ள வேண்டும்.
* பின்னர் அதே வாணலியை அடுப்பில் வைத்து, அதில் 1 டேபிள் ஸ்பூன் எண்ணெய் ஊற்றி சூடானதும், கறிவேப்பிலை, கொத்தமல்லி, புதினா ஆகியவற்றை சேர்த்த 2 நிமிடம் வதக்கி இறக்கி குளிர வைத்து, மிக்சர் ஜாரில் போட்டு ஒருமுறை லேசாக அரைத்துக் கொள்ள வேண்டும்.
* பின்பு ஒரு வாணலியை அடுப்பில் வைத்து, அதில் 4 டேபிள் ஸ்பூன் நல்லெண்ணெய் ஊற்றி சூடானதும், கடுகு, பூண்டு, வரமிளகாய் சேர்த்து நன்கு வதக்க வேண்டும்.
* பிறகு அதில் புளி சாற்றினை ஊற்றி கிளறி, நன்கு 5 நிமிடம் கொதிக்க விட வேண்டும்.
* பின் அதில் அரைத்து வைத்துள்ள பொடியை சேர்த்து, அத்துடன் மிளகாய் தூள், மல்லித் தூள், சுவைக்கேற்ப உப்பு சேர்த்து நன்கு கிளறி, நீர் வற்றும் வரை கொதிக்க விட வேண்டும்.
* நீர் வற்றியதும், அரைத்து வைத்துள்ள மல்லியை சேர்த்து நன்கு கிளறி, 10-15 நிமிடம் நன்கு நிறம் மாறும் வரை கொதிக்க வைக்க வேண்டும்.
* இறுதியாக அதில் சிறிது வெல்லத்தை சேர்த்து கிளறி, 2 நிமிடம் கொதிக்க வைத்து இறக்கினால், சுவையான கொத்தமல்லி தொக்கு தயார்.

Image Courtesy: Apoorvaa's Nalabagam