கொங்கு ஸ்பெஷல் சிக்கன் வறுவல் ரெசிபி... ஒரு தடவ செஞ்சு பாருங்க... அப்புறம் எல்லா வாரமும் செய்வீங்க...!

Kongu Special Chicken Fry in Tamil: ஞாயிறுக் கிழமை என்றாலே அசைவ உணவுகள்தான். பொதுவாக சண்டே அன்று சிக்கன், மட்டன், மீன் மற்றும் நண்டு என பலவிதமான அசைவ உணவுகளால் பெரும்பாலான வீடுகள் நிறைந்திருக்கும். இதில் மற்ற உணவுகளை விட சமைப்பதற்கு மிகவும் எளிதானது சிக்கன்தான். விலையிலும் சரி, சுவையிலும் சரி சிக்கன் பெரும்பாலான மக்களால் விரும்பப்படுவதாக உள்ளது.

சிக்கனை பல்வேறு வழிகளில் சுவையாக சமைக்கலாம். அந்த வகையில் இந்த பதிவில் நாம் பார்க்கப்போவது கொங்கு ஸ்பெஷல் சிக்கன் வறுவல். இதை கிரேவியாகவும் சாப்பிடலாம் அல்லது சுக்காவாகவும் சாப்பிடலாம். இந்த பதிவில் கொங்கு ஸ்பெஷல் சிக்கன் வறுவலை எப்படி செய்யலாம் என்று தெரிந்து கொள்ளலாம்.

தேவையான பொருட்கள்:

- சிக்கன் - அரை கிலோ
- இடித்த பூண்டு - 10 பல்
- வர மிளகாய் - 10
- கறிவேப்பிலை - ஒரு கொத்து
- சின்ன வெங்காயம் 25
- இஞ்சி பூண்டு விழுது 2 ஸ்பூன்
- மஞ்சள் தூள் - 1/4 ஸ்பூன்
- தக்காளி - 1
- நல்லெண்ணெய் - 1 ஸ்பூன்
- சோம்பு - கால் ஸ்பூன்
- உப்பு - தேவையான அளவு
- தண்ணீர் - தேவையான அளவு

மசாலா அரைக்க:

- வரக்கொத்தமல்லி- 2 ஸ்பூன்
- மிளகு - 1 ஸ்பூன்
- சீரகம் - அரை ஸ்பூன்
- சோம்பு - அரை ஸ்பூன்
- இலவங்கப்பட்டை - 1
- கிராம்பு - 4 இலவங்கம்

செய்முறை:

- ஒரு கடாயில் வரக்கொத்தமல்லி, மிளகு, சீரகம், சோம்பு, பட்டை, கிராம்பு மற்றும் கறிவேப்பிலை சேர்த்து நன்கு வறுத்துக் கொள்ளவும், இது ஆறியதும் ஒரு மிக்ஸி ஜாரில் சேர்த்து அரைத்து வைத்துக் கொள்ளவும்

- அதே கடாயில் நல்லெண்ணெய் ஊற்றி எண்ணெய் சூடானதும் அதில் அரை ஸ்பூன் சோம்பு ,இடித்த பூண்டு ,வர மிளகாய் சேர்த்து வதக்கவும்.

- பின்னர் நறுக்கிய சின்ன வெங்காயம் சேர்த்து பொன்னிறமாகும் வரை வதக்கவும். அதன் பின் இஞ்சி பூண்டு விழுதை சேர்த்து பச்சை வாசனை போகும் வரை வதக்கவும்.

- பின்னர் நறுக்கிய தக்காளி மற்றும் கறிவேப்பிலை சேர்த்து பச்சை வாசனை போகும் வரை வதக்கிக் கொள்ளவும்.

- அதன்பின் மஞ்சள் சேர்த்து பின்னர் சிக்கன் சேர்த்து வதக்கவும். சிக்கன் ஓரளவிற்கு வெந்ததும் அரைத்து வைத்திருந்த மசாலா பொடிசேர்த்து தேவையான அளவு உப்பு ஒரு கப் தண்ணீர் சேர்த்து 20 நிமிடம் சிக்கனை மூடி வைத்து வேக வைக்கவும்

- சிக்கன் நன்கு வெந்ததும் பின் கறிவேப்பிலை தூவி இறக்கினால் சூப்பரான கொங்கு ஸ்பெஷல் கோழி வறுவல் ரெடி!