1 கப் ராகி மாவு இருந்தா.. ஈவ்னிங் இந்த ஸ்நாக்ஸை செஞ்சு சாப்பிடுங்க.. மொறுமொறுன்னு செமயா இருக்கும்..

Kezhvaragu Pakoda Recipe In Tamil: மாலை வேளையில் உங்கள் பிள்ளைகள் சாப்பிட மொறுமொறுவென்று ஏதாவது செய்து கொடுக்க கேட்கிறார்களா? உங்கள் பிள்ளைகளுக்கு சத்தான அதே சமயம் ருசியான ஸ்நாக்ஸ் செய்து கொடுக்க நினைக்கிறீர்களா? உங்கள் வீட்டில் ராகி மாவு உள்ளதா?

அப்படியானால் அந்த ராகி மாவைக் கொண்டு, காபி, டீ போடும் நேரத்திற்குள் மொறுமொறுப்பான பக்கோடாவை செய்யுங்கள். இந்த ராகி பக்கோடா செய்வதற்கு மிகவும் சுலபமாக இருப்பதோடு, குழந்தைகள் முதல் பெரியவர்கள் வரை அனைவரும் கேட்டு விரும்பி சாப்பிடக்கூடியவாறும் இருக்கும்.

உங்களுக்கு ராகி பக்கோடாவை எப்படி செய்வதென்று தெரிந்து கொள்ள வேண்டுமா? கீழே ராகி பக்கோடா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* ராகி மாவு - 1 கப்
* சீரகம் - 1/2 டீஸ்பூன்
* சோம்பு - 1 டீஸ்பூன்
* மிளகாய் தூள் - 2 டீஸ்பூன்
* பொட்டுக்கடலை - 3 டேபிள் ஸ்பூன்
* சமையல் சோடா - 2 சிட்டிகை
* உப்பு - சுவைக்கேற்ப
* பூண்டு - 10 பல்
* கறிவேப்பிலை - 2 கொத்து
* வெங்காயம் - 3 (நீளவாக்கில் மெல்லியதாக நறுக்கியது)
* தண்ணீர் - சிறிது
* எண்ணெய் - பொரிப்பதற்கு தேவையான அளவு

செய்முறை:

* முதலில் ஒரு பாத்திரத்தில் ராகி மாவை எடுத்துக் கொள்ள வேண்டும்.
* பின் அதில் சீரகம், சோம்பு, மிளகாய் தூள், பொட்டுக்கடலை ஆகியவற்றை சேர்க்க வேண்டும்.
* பின்பு அதில் சமையல் சோடா, சுவைக்கேற்ப உப்பு சேர்க்க வேண்டும்.
* பிறகு பூண்டு பற்களை நன்கு தட்டிப் போட்டு, அத்துடன் கறிவேப்பிலை சேர்க்க வேண்டும்.
* பின்னர் நீளவாக்கில் நறுக்கிய வெங்காயத்தை சேர்த்து கைகளால் நன்கு கிளறி விட வேண்டும்.
* அடுத்து அதில் சிறிது நீரை ஊற்றி, பக்கோடா மாவு பதத்திற்கு பிசைந்து கொள்ள வேண்டும்.
* இறுதியாக ஒரு வாணலியை அடுப்பில் வைத்து, அதில் பொரிப்பதற்கு தேவையான அளவு எண்ணெய் ஊற்றி சூடானதும், பிசைந்த மாவை கொஞ்சம் கொஞ்சமாக எடுத்து எண்ணெயில் கிள்ளி போட்டு, பொன்னிறமாக பொரித்து எடுத்தால், சுவையான மற்றும் மொறுமொறுப்பான ராகி பக்கோடா தயார்.