கேரளா ஸ்டைல் வெஜ் சொதி

இன்று இரவு உங்கள் வீட்டில் உள்ளோர் வித்தியாசமாக சாப்பிட கேட்கிறார்களா? தினமும் இட்லி, தோசை, சப்பாத்தி என்று சாப்பிட்டு போரடித்துவிட்டதா? அப்படியானால் இன்று இரவு ஆப்பம் செய்து கொடுங்கள். இந்த ஆப்பத்திற்கு பலரும் தேங்காய் பால் தான் ஊற்றி சாப்பிடுவார்கள். ஆனால் இன்று அந்த ஆப்பத்திற்கு கேரளா ஸ்டைல் வெஜ் சொதி செய்து கொடுங்கள். இந்த வெஜ் சொதி மிகவும் சுவையானது மட்டுமின்றி, ஆரோக்கியமானதும் கூட. இதை செய்வது மிகவும் சுலபம். முக்கியமாக இந்த சொதியை 15 நிமிடத்தில் செய்துவிடலாம்.

உங்களுக்கு கேரளா ஸ்டைல் வெஜ் சொதி எப்படி செய்வதென்று தெரிந்து கொள்ள வேண்டுமா? கீழே கேரளா ஸ்டைல் வெஜ் சொதி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* வெங்காயம் - 1 (நறுக்கியது)

* பச்சை மிளகாய் - 2 (கீறியது)

* இஞ்சி பூண்டு பேஸ்ட் - 1 டேபிள் ஸ்பூன்

* கேரட் - 1 (பொடியாக நறுக்கியது)

* பீன்ஸ் - 5 (பொடியாக நறுக்கியது)

* உருளைக்கிழங்கு - 1 (தோலுரித்து, நறுக்கியது)

* பச்சை பட்டாணி - 1 கப்

* கெட்டியான தேங்காய் பால் - 1 கப்

* நீர் போன்ற தேங்காய் பால் - 2 கப்

* உப்பு - சுவைக்கேற்ப

* சர்க்கரை - 1 டீஸ்பூன்

* தேங்காய் எண்ணெய் - 1 டேபிள் ஸ்பூன்

* பட்டை - 1 சிறிய துண்டு

* ஏலக்காய் - 2

செய்முறை:

* முதலில் ஒரு வாணலியை அடுப்பில் வைத்து, அதில் தேங்காய் எண்ணெய் ஊற்றி சூடானதும், பட்டை, ஏலக்காய் சேர்த்து தாளிக்க வேண்டும்.

* பின்னர் அதில் வெங்காயத்தைப் போட்டு 3 நிமிடம் வதக்க வேண்டும்.

* பின் அதில் இஞ்சி பூண்டு பேஸ்ட் சேர்த்து பச்சை வாசனை போக வதக்க வேண்டும்.

* அடுத்து அதில் நறுக்கி வைத்துள்ள காய்கறிகள் மற்றும் பச்சை பட்டாணி சேர்த்து, பச்சை மிளகாயை போட்டு நன்கு கிளறி விட வேண்டும்.

* பின்பு அதில் சுவைக்கேற்ப உப்பு மற்றும் சர்க்கரை சேர்த்து கிளறி, நீர் போன்ற தேங்காய் பாலை ஊற்றி கிளறி, மிதமான தீயில் வைத்து, காய்கறிகளை வேக வைக்க வேண்டும்.

* காய்கறிகள் நன்கு வெந்ததும், அடுப்பை அணைத்துவிட்டு, அதில் கெட்டியான தேங்காய் பால் சேர்த்து கிளறினால், சுவையான கேரளா ஸ்டைல் வெஜ் சொதி தயார்.

Image Courtesy: yummytummyaarthi