கேரளா ஸ்டைல் முட்டைக்கறி ரெசிபி... இப்படி செஞ்சு பாருங்க... தோசை, சப்பாத்திக்கு அட்டகாசமாக இருக்கும்...!

Kerala Style Mutta Curry Recipe in Tamil: உங்கள் வீட்டில் அடிக்கடி முட்டை செய்வீர்களா? எப்போதும் முட்டையை ஒரே சுவையில் தான் செய்வீர்களா? கேரளாவுக்கு சென்றால் அங்கு அனைத்து ஹோட்டல்களிலும் பிரதானமாக இருக்கு ஒரு உணவென்றால் அது ஆப்பம்-முட்டைக் கறிதான். இந்த முட்டைக் கறி மற்ற முட்டை குழம்புகளை போல அல்லாமல் கொஞ்சம் வித்தியாசமாக அட்டகாசமாக இருக்கும்.

இந்த முட்டைக்கறி ஆப்பத்துக்கு மட்டுமின்றி புரோட்டா, தோசைக்கும் அட்டகாசமாக இருக்கும், இந்த முட்டைக்கறியை சாப்பிட நீங்கள் கேரளாவுக்குத்தான் செல்ல வேண்டுமென்ற அவசியமில்லை. அதை நாம் வீட்டிலேயே மிகவும் எளிதாக செய்து விடலாம். இந்த முட்டைக்கறியை செய்வதற்கு மிகவும் அவசியமான ஒரு பொருளென்றால் அது திக்கான தேங்காய்ப்பால்தான்.

உங்களுக்கு கேரளா ஸ்டைல் முட்டைக்கறியை எப்படி செய்வதென்று தெரிந்து கொள்ள வேண்டுமா? கீழே கேரளா ஸ்டைல் முட்டைக்கறி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

- 4 முட்டை
- ¼ டீஸ்பூன் கடுகு
- 1 பெரிய வெங்காயம் நறுக்கியது
- 3 பச்சை மிளகாய்
- 2 கொத்து கறிவேப்பிலை
- 2 ஸ்பூன் இஞ்சி பூண்டு விழுது
- ¼ டீஸ்பூன் மஞ்சள் தூள்
- 1 டேபிள் ஸ்பூன் காஷ்மீரி மிளகாய் தூள்
- 1 டீஸ்பூன் மிளகு தூள்
- 1 ½ டீஸ்பூன் கரம் மசாலா
- ½ டீஸ்பூன் சீரகத் தூள்
- 1 டேபிள்ஸ்பூன் கொத்தமல்லி தூள்
- 1 தக்காளி நறுக்கியது
- 2 கப் திக்கான தேங்காய் பால்
- தேவையான அளவு உப்பு
- தேங்காய் எண்ணெய் - 4 ஸ்பூன்
- நறுக்கிய கொத்தமல்லி - ஒரு கைப்பிடி

செய்முறை:

- முதலில் முட்டையை மூழ்கும் அளவு தண்ணீரில் போட்டு சிறிதளவு உப்பு சேர்த்து 10 நிமிடம் வேகவைத்து உரித்து தனியாக வைத்துக் கொள்ளவும்.

- வெங்காயம் மற்றும் தக்காளியை பொடிப்பொடியாக நறுக்கி வைத்துக் கொள்ளவும். இஞ்சி, பூண்டை விழுதாக அரைத்துக் கொள்ளவும்.

- ஒரு பாத்திரத்தில் தேங்காய் எண்ணெயை ஊற்றி சூடானதும் கடுகு போட்டு தாளிக்கவும்.

- கடுகு வெடித்ததும் நறுக்கிய பெரிய வெங்காயம், பச்சை மிளகாய், கறிவேப்பிலை மற்றும் சிறிதளவு உப்பு ஆகியவற்றை வாணலியில் சேர்க்கவும்.

- உப்பு வெங்காயத்திலிருந்து ஈரப்பதத்தை உறிஞ்சி வெங்காயம் வேகமாக வேக உதவுகிறது. வெங்காயம் பொன்னிறமாக மாறும் வரை நன்கு வதக்கவும்.

- பின்னர் இஞ்சி, பூண்டு விழுது சேர்த்து நன்றாக கிளறவும்.

- பச்சை வாசனை போனதும் மஞ்சள் தூள், மிளகாய் தூள், மிளகு தூள், கொத்தமல்லி தூள், கரம் மசாலா மற்றும் பெருஞ்சீரக தூள் சேர்க்கவும். தேவைக்கேற்ப தண்ணீர் சேர்த்து நன்கு கிளறவும்.

- மசாலா பச்சை வாசனை போனதும் நறுக்கிய தக்காளி சேர்த்து மசாலாவுடன் நன்றாக கிளறவும்.

- தக்காளி வெந்தவுடன் எடுத்து வைத்திருக்கும் திக்கான தேங்காய்ப்பாலை சேர்க்கவும், பின்னர் தேவையான அளவு உப்பை சேர்த்து நன்கு கிளறவும்.

- மசாலா நன்கு கொதி வந்ததும் வேகவைத்த முட்டையை சேர்த்து முட்டை உடையாமல் நன்கு கிளறவும்.

- கிரேவி நன்கு கொதித்து திக்கானதும் நறுக்கிய கொத்தமல்லி தூவி இறக்கினால் சுவையான கேரளா ஸ்டைல் முட்டைக்கறி ரெடி!