இட்லி, தோசைக்கு ஏற்ற காரைக்குடி ஸ்பெஷல் வெங்காய கொசமல்லியை எப்படி செய்யணும் தெரியுமா?

Karaikudi Special Vengaya Kosamalli Recipe In Tamil: காலையில் இட்லி அல்லது தோசை தான் செய்யப் போகிறீர்களா? அதற்கு ஒரு அருமையான சைடு டிஷ் செய்ய நினைக்கிறீர்களா? அப்படியானால் அதற்கு ஒரு காரைக்குடி சைடுடிஷ்ஷை செய்யுங்கள். அது தான் காரைக்குடி வெங்காய கொசமல்லி. இது இட்லி, தோசையுடன் சாப்பிட அட்டகாசமாக இருக்கும். முக்கியமாக இது செய்வதற்கு மிகவும் சுலபமாக இருக்கும். சட்டென்று 10 நிமிடத்தில் செய்துவிடலாம்.

உங்களுக்கு காரைக்குடி ஸ்பெஷல் வெங்காய கொசமல்லியை எப்படி செய்வதென்று தெரிந்து கொள்ள வேண்டுமா? கீழே காரைக்குடி ஸ்பெஷல் வெங்காய கொசமல்லி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* கடலை எண்ணெய் - 2 டேபிள் ஸ்பூன்
* சோம்பு - 1 டீஸ்பூன்
* கல்பாசி - 1 துண்டு
* பட்டை - 1 துண்டு
* பெரிய வெங்காயம் - 1
* தக்காளி - 2
* உப்பு - சுவைக்கேற்ப
* தண்ணீர் - தேவையான அளவு
* கொத்தமல்லி - சிறிது

அரைப்பதற்கு...

* தேங்காய் - 1 கைப்பிடி
* பொட்டுக்கடலை - 2 டேபிள் ஸ்பூன்
* சோம்பு - 1 டீஸ்பூன்
* கசகசா - 1/2 டீஸ்பூன்
* வரமிளகாய் - 3

செய்முறை:

* முதலில் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், பட்டை, கல்பாசி, சோம்பு சேர்த்து தாளிக்க வேண்டும்.
* பின் அதில் பொடியாக நறுக்கிய வெங்காயத்தை சேர்த்து கண்ணாடி பதத்திற்கு வதக்க வேண்டும்.
* பின்பு அதில் தக்காளியை சேர்த்து வதக்க வேண்டும். தக்காளி வதங்குவதற்குள் அரைக்க வேண்டியதை அரைத்துக் கொள்ளலாம்.
* அதற்கு மிக்சர் ஜாரில் தேங்காய், பொட்டுக்கடலை, சோம்பு, கசகசா, வரமிளகாய் சேர்த்து, சிறிது நீரை ஊற்றி நன்கு மென்மையாக அரைத்து பேஸ்ட் செய்து கொள்ள வேண்டும்.
* பின் அரைத்ததை வதங்கிக் கொண்டிருக்கும் தக்காளியுடன் சேர்த்து, 2 நிமிடம் கிளறி விட வேண்டும்.
* பிறகு அதில் தேவையான அளவு நீரை ஊற்றி, சுவைக்கேற்ப உப்பு சேர்த்து நன்கு பச்சை வாசனை போக கொதிக்க வைத்து இறக்கி, கொத்தமல்லியைத் தூவினால், சுவையான வெங்காய கொசமல்லி தயார்.

Image Courtesy: Pinterest