1 கப் கடலைப்பருப்பு இருந்தா சூப்பரான இனிப்பை செஞ்சு கொடுங்க... எல்லோருக்குமே ரொம்ப பிடிக்கும்...!

Kadalai Paruppu Sweet Bonda Recipe in Tamil: குழந்தைகளுக்கு ஆரோக்கியமான ஈவினிங் ஸ்னாக்ஸ் கொடுக்க வேண்டும் என்பது தான் அதிகளவிலான பெற்றோரின் விருப்பம். சில நேரத்தில் ஆரோக்கியமாக கொடுக்கும் உணவுகள் குழந்தைகளுக்கு பிடிப்பதில்லை.

பெரும்பாலும் குழந்தைகள் இனிப்பு சார்ந்த உணவு வகைகளையே விரும்புவார்கள். அதற்கு ஏற்ப நாம் ஆரோக்கியான பதார்த்தங்களை இனிப்பாக கொடுத்தால் அவர்களும் விரும்பி சாப்பிடுவார்கள். நமக்கும் நமது கவலை குறையும். சரி வாங்க ஆரோக்கியமான இனிப்பான கடலை பருப்பு ஸ்வீட் போண்டா எப்படி செய்வது என பார்க்கலாம்.

தேவையான பொருட்கள்:

- உளுத்தம் மாவு - 100 கிராம்
- அரிசி மாவு - 20 கிராம்
- எண்ணெய் - தேவையான அளவு (பொரிக்க)
- உப்பு - ஒரு சிட்டிகை

பூரணம் செய்ய:

- கடலைப் பருப்பு - 200 கிராம்
- தேங்காய் - 1 மூடி
- ஏலக்காய்த் தூள் - சிறிதளவு
- வெல்லம் - 150 கிராம்
- நெய் - 1 டீ ஸ்பூன்

செய்முறை:

- முதலில் கடலைப் பருப்பை இரண்டு அல்லது மூன்று முறை தண்ணீரில் அலசி சுத்தம் செய்து கொள்ளவும்.

- அதை குக்கரில் சேர்த்து தேவையான அளவு தண்ணீர் விட்டு நன்றாக வேக வைத்து ஆற விடவும்.

- பின் அதை நன்றாக கைகளில் மசித்தோ அல்லது மிக்ஸி ஜாரில் தண்ணீர் சேர்க்காமல் அரைத்தோ எடுத்து கொள்ளவும்.

- தேங்காயை துருவி தனியாக வைத்து கொள்ளவும்.

- ஒரு பாத்திரத்தை அடுப்பில் வைத்து வெல்லம் மற்றும் சிறிதளவு தண்ணீர் சேர்த்து வெல்லம் நன்றாக கரையும் வரை வைத்திருக்கவும்.

- பின் அதை தூசி இல்லாமல் வடித்து சுத்தம் செய்து கொள்ளவும்.

- அதை மசித்து வைத்த பருப்புடன் சேர்த்து நன்றாக கிளறவும்.

- அதை அடுப்பில் வைத்து அதனுடன் தேங்காய் துருவல் மற்றும் ஏலக்காய் தூள் சேர்த்து நன்கு கிளறவும்.

- பின் சிறிதளவு நெய் சேர்த்து கிளறி பூரண பதம் வந்ததும் இறக்கிவிடவும்.

- கையில் சிறிதளவு எண்ணெய் தடவி கொண்டு, பூரணத்தை சிறிய சிறிய உருண்டைகளாக உருட்டி கொள்ளவும்.

- உளுந்தம் மாவு, அரிசி மாவு, மற்றும் சிறிதளவு உப்பு சேர்த்து கிளறவும்.

- அதனுடன் சிறிதளவு தண்ணீர் சேர்த்து தோசை மாவு பதத்திற்கு கரைத்து கொள்ளவும்.

- வாணலியை அடுப்பில் வைத்து சூடானதும் பொரிக்க தேவையான அளவு எண்ணெய் சேர்த்து காய விடவும்.

- பின் உருட்டி வைத்த பூரண உருண்டைகளை கரைத்த மாவில் முக்கி எடுத்து சூடான எண்ணெயில் போட்டு மிதமான சூட்டில் பொரித்து எடுக்கவும்.

- அதே போல் எல்லா உருண்டைகளையும் பொரித்து எடுத்தால் சுவையான கடலை பருப்பு ஸ்வீட் போண்டா ரெடி!