ஐயங்கார் ஸ்டைல் வாழைக்காய் பொடிமாஸ் ரெசிபி - இந்த மாதிரி சைடிஷ் செஞ்சு பாருங்க - டேஸ்ட் சூப்பரா இருக்கும

Iyengar Style Vazhakkai Podimas Recipe in Tamil: தினமும் என்ன சமைப்பது என்பதுதான் பெரும்பாலான பெண்களுக்கு இருக்கும் மிகப்பெரிய பிரச்சினையாகும். தினமும் ஒரே மாதிரியான குழம்பு அல்லது பொரியல் செய்து போரடித்துவிட்டதா? அவ்வப்போது சற்று வித்தியாசமான ரெசிபிக்களை வீட்டில் செய்து சாப்பிட விரும்புகிறீர்களா? அப்படியென்றால் ஐயங்கார் ஸ்டைலில் ஒருமுறை வாழைக்காய் பொடிமாஸை முயற்சி செய்து பாருங்கள்.

பொதுவாக ஐயங்கார் ஸ்டைல் ரெசிபி என்றாலே அதற்கு தனித்துவமான ருசியும், மணமும் இருக்கும் என்று கூறுவார்கள். இந்த வாழைக்காய் பொடிமாஸ் அதற்கு விதிவிலக்கல்ல. வழக்கமான பொரியல், கூட்டு என்று சாப்பிட்டு போரடித்தவர்களுக்கு இந்த வாழைக்காய் பொடிமாஸ் புதுவிதமான சுவையைக் கொடுக்கும். இந்த ஸ்டைல் பொடிமாஸ் செய்வதற்கு எளிதானது, இதன் சுவையும் மிகவும் தனித்துவமானதாக இருக்கும்.

உங்களுக்கு ஐயங்கார் ஸ்டைல் வாழைக்காய் பொடிமாஸ் எப்படி செய்வதென்று தெரிந்து கொள்ள வேண்டுமா? கீழெ ஐயங்கார் ஸ்டைல் மவாழைக்காய் பொடிமாஸ் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

- 1 வாழைக்காய்
- 2 ஸ்பூன் துருவிய தேங்காய்
- தேவையான அளவு உப்பு

தாளிக்க:

- 1 ஸ்பூன் தேங்காய் எண்ணெய்
- 1/4 ஸ்பூன் கடுகு
- 1 ஸ்பூன் கடலைப்பருப்பு
- சிறிது கறிவேப்பிலை
- 1 ஸ்பூன் உளுத்தம் பருப்பு
- 1/2 ஸ்பூன் பெருங்காயத் தூள்
- 2 பச்சை மிளகாய்
- 1/4 தேக்கரண்டி சுக்குத் தூள்
- 2 ஸ்பூன் எலுமிச்சை சாறு

செய்முறை:

- முதலில் இட்லி பாத்திரத்தில் நீரை ஊற்றிக் கொதிக்க வைக்கவும்.

- வாழைக்காயை இட்லி பாத்திரத்தில் வைத்து, அவை மென்மையாகும் வரை மற்றும் தோல் எளிதாக உரிக்கும் நிலையை எட்டும் வரையிலும் 7 முதல் 9 நிமிடங்கள் வரை ஆவியில் வேகவைக்கவும்.

- வாழ்க்கை ஆறியதும் தோலை உரித்து விடவும்.

- வாழைக்காயை தேவையான அளவில் நறுக்கியோ அல்லது துருவியோக் கொள்ளவும்.

- அதனுடன் தேங்காய் மற்றும் உப்பு சேர்த்து நன்றாகக் கலக்கவும்.

- ஒரு அகலமான மற்றும் அடிகனமான வாணலியில் எண்ணெய் ஊற்றிச் சூடாக்கவும்.

- எண்ணெய் சூடானதும் கடுகு, உளுத்தம் பருப்பு, கடலைப்பருப்பு மற்றும் கறிவேப்பிலை சேர்த்து தாளிக்கவும்.

- கடுகு பொரிந்ததும் நறுக்கிய பச்சை மிளகாய் மற்றும் சுக்குப் பொடியைச் சேர்த்து நன்றாகக் கலந்து கிளறவும்.

- பின்னர் பெருங்காயம் சேர்த்து நன்றாகக் கலக்கவும்.

- அடுப்பை மிதமான தீயில் வைத்து, வாழைக்காய்-தேங்காய் கலவையைச் சேர்க்கவும்.

- மிதமான தீயில் 2 நிமிடம் சமைக்கவும்.

- அடுப்பை அணைத்துவிட்டு எலுமிச்சைச் சாறு சேர்க்கவும்.

- நன்றாகக் கலந்து சாம்பார் சாதம் அல்லது ரசம் சாதத்துடன் பரிமாறவும்.

- இது காரம் குறைவாக இருப்பதால் குழந்தைகளும் விரும்பி சாப்பிடுவார்கள்.