ஹைதராபாத் சிக்கன் கிரேவி ரெசிபி... இந்த மாதிரி செய்யுங்க... தோசை, சப்பாத்திக்கு சுருக்குனு சூப்பரா இருக்கும்..

Hyderabadi Chicken Recipe in Tamil: அசைவ உணவுகளில் அனைவருக்கும் பிடித்த ஒரு பொருள் என்றால் அது சிக்கன்தான். சிக்கன் சுவையானது என்பதை விட அது சமைப்பதற்கு மிகவும் எளிதானதும் கூட. அப்படிப்பட்ட ஒரு சுவையான மற்றும் எளிதான சிக்கன்தான் ஹைதராபாத் சிக்கன். தனித்துவமான சுவையுடன் கூடிய காரமான சைடிஷ்களை விரும்புபவர்களுக்காகவே உருவாக்கப்பட்டது இந்த சிக்கன். இது தோசை, சப்பாத்திக்கு மட்டுமின்றி சாதத்தில் பிசைந்து சாப்பிடவும் அருமையாக இருக்கும்.

ஹைதராபாத் உணவுகள் என்றாலே கொஞ்சம் காரசாரமாக சுருக்குனுதான் இருக்கும். இந்த சிக்கனும் அதற்கு விதிவிலக்கல்ல. தோசை, சப்பாத்தி, புரோட்டா போன்றவற்றுக்கு காரமான அதேசமயம் சுவையான கிரேவியை விரும்புபவர்கள் இதை அவசியம் முயற்சிக்க வேண்டும். இதை கிரேவியாகவும் சாப்பிடலாம் அல்லது நன்கு சண்ட விட்டு ஸ்டார்ட்டராகவும் சாப்பிடலாம்.

உங்களுக்கு ஹைதராபாத் சிக்கன் கிரேவியை எப்படி செய்வதென்று தெரிந்து கொள்ள வேண்டுமா? கீழே ஹைதராபாத் சிக்கன் கிரேவியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

மேரினேட் செய்ய:

- அரை கிலோ சிக்கன்
- அரை ஸ்பூன் மஞ்சள் தூள்
- 1 டேபிள் ஸ்பூன் மிளகாய் தூள்
- 1 டேபிள் ஸ்பூன் உப்பு
- 1 டேபிள் ஸ்பூன் கரம் மசாலா
- 2 டேபிள் ஸ்பூன் இஞ்சி பூண்டு விழுது
- ½ டேபிள் ஸ்பூன் சீரகத் தூள்
- 3 ஸ்பூன் கெட்டித் தயிர்

கிரேவி செய்ய:

- 2 பெரிய வெங்காயம்
- 2 பிரியாணி இலை
- 4 ஏலக்காய்
- 1 இன்ச் பட்டை
- அரை ஸ்பூன் மல்லி விதை
- 1 ஸ்பூன் மிளகாய் தூள்
- 1 ஸ்பூன் கரம் மசாலா
- 3 ஸ்பூன் எண்ணெய்
- 2 ஸ்பூன் நெய்
- 5 கீறிய பச்சை மிளகாய்
- உப்பு தேவையான அளவு
- ஒரு கைப்பிடி கொத்தமல்லி
- சூடான தண்ணீர் - 1 கப்

செய்முறை:

- முதலில் சிக்கனை நன்றாக கழுவி தண்ணீர் இல்லாமல் வடிகட்டி வைத்துக் கொள்ளவும்.

- ஒரு அகலமான பாத்திரத்தில் கழுவி வைத்துள்ள சிக்கன் துண்டுகளை போட்டு அதில் மேரினேட் செய்ய கொடுத்துள்ள பொருட்களை ஒவ்வொன்றாக போட்டு நன்றாக கிளறி ஒரு மூடி போட்டு அரை மணி நேரம் முதல் ஒரு மணி நேரம் வரை ஊற வைக்கவும்.

- ஒரு பாத்திரத்தை அடுப்பில் வைத்து மிதமான சூட்டில் சூடாக்கி, அதில் நெய் மற்றும் எண்ணெயை சேர்க்கவும்.

- பின்னர் நறுக்கிய வெங்காயத்தைச் சேர்த்து, 2-3 நிமிடங்கள் அல்லது பொன்னிறமாகும் வரை வறுக்கவும். வறுத்த வெங்காயத்தை வடிகட்டி தனியாக வைக்கவும்.

- மீதமுள்ள எண்ணெயில், பிரியாணி இலை, ஏலக்காய், இலவங்கப்பட்டை, கொத்தமல்லி விதைகள் ஆகியவற்றைச் சேர்த்து சில வினாடிகள் வதக்கவும்.

- பின்னர் ஊறவைத்த சிக்கன் துண்டுகளைச் சேர்த்து, மிதமான தீயில் 2 நிமிடம் வதக்கவும். பின்னர் வெந்நீரை ஊற்றி, மிளகாய்த்தூள், நறுக்கிய கொத்தமல்லி, வறுத்த வெங்காயம் மற்றும் தேவையான அளவு உப்பு சேர்க்கவும்.

- பின்னர் தீயைக் குறைத்து, மூடி வைத்து மூடி, 20 நிமிடங்கள் சிக்கன் மென்மையாகும் வரை வேக வைக்கவும். அவ்வப்போது கிளறி, சுவைத்துப் பார்த்து, தேவைப்பட்டால் மேலும் உப்பு மற்றும் தண்ணீர் சேர்க்கவும்.

- பின்னர் ஒரு ஸ்பூன் கரம் மசாலா மற்றும் பச்சை மிளகாய் சேர்த்து 2 நிமிடம் மூடி வைத்து வேக வைக்கவும்.

- பின்னர் நன்றாகக் கிளறி, அடுப்பை அணைத்து கொத்தமல்லி இலை தூவி அலங்கரிக்கவும்.

- அவ்வளவுதான் சூப்பரான ஹைதராபாத் சிக்கன் கிரேவி ரெடி. இதை சூடான தோசை, சப்பாத்தி, சாதத்துடன் சேர்த்து சாப்பிடவும்.