சரவணபவன் ஹோட்டல் ஸ்டைல் தக்காளி சட்னியை எப்படி செய்யணும் தெரியுமா?

Hotel Style Tomato Chutney Recipe In Tamil: தமிழ் புத்தாண்டை முன்னிட்டு பலரது வீடுகளிலும் காலையில் இட்லி, சட்னி, சாம்பார், வடை என்றெல்லாம் செய்து சாப்பிடுவோம். இப்படி நீங்களும் உங்கள் வீட்டில் இட்லி தான் செய்யப் போகிறீர்களா? அப்படியானால் அந்த இட்லிக்கு தேங்காய் சட்னியுடன், ஒரு தக்காளி சட்னியையும் செய்யுங்கள்.

அதுவும் சரவணபவன் ஹோட்டல் ஸ்டைலில் தக்காளி சட்னியை செய்யுங்கள். இதனால் மிகவும் அட்டகாசமாக இருக்கும். மேலும் இது அனைவரும் விரும்பி சாப்பிடக்கூடியவாறு இருக்கும். முக்கியமாக இந்த சட்னி 10 நிமிடத்தில் செய்யக்கூடியவாறு ஈஸியாகவும் இருக்கும்.

உங்களுக்கு இந்த ஹோட்டல் ஸ்டைல் தக்காளி சட்னியை எப்படி செய்வதென்று தெரிந்து கொள்ள வேண்டுமா? கீழே ஹோட்டல் ஸ்டைல் தக்காளி சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* நல்லெண்ணெய் - 2 டீஸ்பூன்
* பூண்டு - 4 பல்
* பெரிய வெங்காயம் - 1 (பொடியாக நறுக்கியது)
* தக்காளி - 4 (பொடியாக நறுக்கியது)
* கறிவேப்பிலை - 1 கொத்து
* மஞ்சள் தூள் - 1/4 டீஸ்பூன்
* வரமிளகாய் - 2
* சீரகம் - 1/2 டீஸ்பூன்
* புளி - 1 சிறிய துண்டு
* உப்பு - சுவைக்கேற்ப
* வெல்லம் - 1 சிறிய துண்டு

தாளிப்பதற்கு...

* எண்ணெய் - 1 டீஸ்பூன்
* கடுகு - 1/2 டீஸ்பூன்
* உளுத்தம் பருப்பு - 1/2 டீஸ்பூன்
* கறிவேப்பிலை - சிறிது

செய்முறை:

* முதலில் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், பூண்டு, வெங்காயம், சிறிது உப்பு சேர்த்து நன்கு மென்மையாகும் வரை வதக்க வேண்டும்.
* பின் அதில் தக்காளி, கறிவேப்பிலை மற்றம் மஞ்சள் தூள் சேர்த்து, தக்காளி மென்மையாகும் வரை வதக்க வேண்டும்.
* பின்பு அதில் வரமிளகாய் மற்றும் சீரகம் சேர்த்து 2 நிமிடம் வதக்க வேண்டும்.
* பிறகு சிறிய துண்டு புளியை சேர்த்து வதக்கி இறக்கி குளிர வைக்க வேண்டும்.
* பின் மிக்சர் ஜாரில் வதக்கிய பொருட்கள் அனைத்தையும் சேர்த்து, சிறிது வெல்லத்தையும் சேர்த்து, சுவைக்கேற்ப உப்பையும் சேர்த்து நன்கு மென்மையாக அரைத்துக் கொள்ள வேண்டும்.
* அடுத்து ஒரு கிண்ணத்தில் அரைத்த சட்னியை எடுத்துக் கொள்ள வேண்டும்.
* இறுதியாக ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், கடுகு, உளுத்தம் பருப்பு, கறிவேப்பிலை சேர்த்து தாளித்து, சட்னியுடன் சேர்த்து கிளறினால், சுவையான ஹோட்டல் ஸ்டைல் தக்காளி சட்னி தயார்.

Image Courtesy: Chitra's Food Book