இட்லி, தோசைக்கு அருமையாக இருக்கும் ஹோட்டல் ஸ்டைல் ரெட் சட்னி.. எப்படி செய்யணும் தெரியுமா?

Hotel Style Red Chutney Recipe In Tamil: காலையில் பெரும்பாலும் உங்கள் வீட்டில் இட்லி, தோசை தான் காலை உணவாக இருக்குமா? தினமும் இதற்கு என்ன சட்னி அரைப்பதென்று யோசிப்பதே ஒரு பெரிய வேலையாக உள்ளதா? இன்னும் என்ன சட்னி செய்வதென்று முடிவெடுக்கவில்லையா?

அப்படியானால் ஹோட்டல் ஸ்டைல் ரெட் சட்னியை செய்யுங்கள். இந்த சட்னி செய்வதற்கு மிகவும் சுலபமாக இருப்பதோடு, அட்டகாசமான சுவையுடனும் இருக்கும். முக்கியமாக இந்த சட்னியை செய்தால் 2 இட்லி சாப்பிடும் உங்கள் பிள்ளைகளும் 1 இட்லியை எக்ஸ்ட்ரா வாங்கி சாப்பிடுவார்கள்.

உங்களுக்கு ஹோட்டல் ஸ்டைல் ரெட் சட்னியை எப்படி செய்வதென்று தெரிந்து கொள்ள வேண்டுமா? கீழே ஹோட்டல் ஸ்டைல் ரெட் சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* நல்லெண்ணெய் - 2 டேபிள் ஸ்பூன்
* கடலைப் பருப்பு - 1 1/2 டேபிள் ஸ்பூன்
* உளுத்தம் பருப்பு - 1 டேபிள் ஸ்பூன்
* பூண்டு - 12 பல்
* புளி - சிறிய அளவு
* பெரிய வெங்காயம் - 1 (நறுக்கியது)
* சின்ன வெங்காயம் - 10
* கறிவேப்பிலை - சிறிது
* வரமிளகாய் - 8
* உப்பு - சுவைக்கேற்ப
* பெருங்காயத் தூள் - சிறிது
* கொத்தமல்லி - சிறிது
* புதினா - சிறிது
* தேங்காய் - 1 பெரிய சில்லு (நறுக்கியது)
* தக்காளி - 2 (நறுக்கியது)

தாளிப்பதற்கு...

* எண்ணெய் - 1 டேபிள் ஸ்பூன்
* கடுகு - 1/2 டீஸ்பூன்
* உளுத்தம் பருப்பு - 1/2 டீஸ்பூன்
* கறிவேப்பிலை - சிறிது
* வரமிளகாய் - 1

செய்முறை:

* முதலில் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், கடலைப் பருப்பு, உளுத்தம் பருப்பு, பூண்டு, புளி சேர்த்து நன்கு பொன்னிறமாகும் வரை வறுக்க வேண்டும்.
* பின்பு அதில் பெரிய வெங்காயம், சின்ன வெங்காயம், கறிவேப்பிலை, வரமிளகாய் சேர்த்து, சுவைக்கேற்ப உப்பு சேர்த்து, வெங்காயம் நன்கு கண்ணாடி பதத்திற்கு வரும் வரை வதக்க வேண்டும்.
* பின்னர் அதில் பெருங்காயத் தூள், மல்லி, புதினா சேர்த்து 20 நொடிகள் வதக்க வேண்டும்.
* பின் அதில் நறுக்கிய தேங்காய் மற்றும் தக்காளியை சேர்த்து, தக்காளி நன்கு மென்மையாகும் வரை வதக்கி இறக்கி குளிர வைக்க வேண்டும்.
* பிறகு மிக்சர் ஜாரில் வதக்கிய பொருட்களை சேர்த்து, சிறிது நீரை ஊற்றி நன்கு மென்மையாக அரைத்துக் கொள்ள வேண்டும்.
* பின் அரைத்த சட்னியை ஒரு கிண்ணத்தில் எடுத்து, தேவையான அளவு நீரை ஊற்றி கலந்து கொள்ள வேண்டும்.
* இறுதியாக ஒரு வாணலியை அடுப்பில் வைத்து, அதில் தாளிப்பதற்கு எண்ணெய் ஊற்றி சூடானதும், கடுகு, உளுத்தம் பருப்பு, கறிவேப்பிலை மற்றும் வரமிளகாய் சேர்த்து தாளித்து, சட்னியுடன் சேர்து கிளறினால், சுவையான ஹோட்டல் ஸ்டைல் ரெட் சட்னி தயார்.

Image Courtesy: Madras Virunthu