நோயெதிர்ப்பு சக்தியை அதிகரிக்கும்... குடைமிளகாய் சட்னி

இன்று இரவு உங்கள் வீட்டில் இட்லி, தோசை செய்ய திட்டமிட்டுள்ளீர்களா? அதற்கு என்ன சைடு டிஷ் செய்வதென்று யோசித்துக் கொண்டிருக்கிறீர்களா? ஒரு வித்தியாசமான சட்னியை செய்ய ரெடியா இருக்கீங்களா? அப்படியானால் குடைமிளகாய் சட்னியை செய்யுங்கள். இந்த குடைமிளகாய் சட்னி செய்வது மிகவும் சுலபம். குறிப்பாக இந்த சட்னி வேலை முடிந்து வீட்டிற்கு சோர்வாக வருபவர்கள், வேகமாக செய்து சாப்பிடும் வகையில் செய்வதற்கு ஈஸியாக இருக்கும். சொல்லப்போனால், இது பேச்சுலர்களுக்கு ஏற்ற ரெசிபியும் கூட.

முக்கியமாக குடைமிளகாயில் வைட்டமின் சி அதிகம் உள்ளது. எனவே குடைமிளகாயை உணவில் அதிகம் சேர்க்கும் போது நோயெதிர்ப்பு சக்தி அதிகரிக்கும். உங்களுக்கு குடைமிளகாய் சட்னி எப்படி எளிய முறையில் செய்வதென்று தெரிந்து கொள்ள வேண்டுமா? கீழே குடைமிளகாய் சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* பச்சை குடைமிளகாய் - 2 (நறுக்கியது)

* பச்சை மிளகாய் - 2 (நறுக்கியது)

* கறிவேப்பிலை - சிறிது

* பூண்டு - 6 பல்

* எள்ளு விதை - 1 டேபிள் ஸ்பூன்

* சீரகம் - 1 டீஸ்பூன்

* கடுகு - 1 டீஸ்பூன்

* புளி - 1 சிறிய துண்டு

* கொத்தமல்லி - 2 டேபிள் ஸ்பூன் (நறுக்கியது)

* மஞ்சள் தூள் - 1/2 டீஸ்பூன்

* உப்பு - சுவைக்கேற்ப

* சர்க்கரை - 1 டீஸ்பூன்

* எண்ணெய் - 1 டேபிள் ஸ்பூன்

செய்முறை:

* முதலில் ஒரு வாணலியை அடுப்பில் வைத்து, அதில் எள்ளு விதைகளைப் போட்டு பொன்னிறமாக வறுத்து இறக்கி குளிர வைத்து, மிக்சர் ஜாரில் போட்டு பொடி செய்து தனியாக வைத்துக் கொள்ள வேண்டும்.

* பின் ஒரு வாணலியை அடுப்பில் வைத்து, அதில் 1 டேபிள் ஸ்பூன் எண்ணெய் ஊற்றி சூடானதும், கடுகு, சீரகம் சேர்த்து தாளிக்க வேண்டும்.

* பின்பு அதில் கறிவேப்பிலை, பச்சை மிளகாய், பூண்டு சேர்த்து வதக்க வேண்டும்.

* பிறகு அதில் உப்பு, மஞ்சள் தூள் சேர்த்து கிளறி, குடைமிளகாயை சேர்த்து நன்கு வதக்க வேண்டும்.

* பின் அதில் கொத்தமல்லியை சேர்த்து சுருங்க வதக்கி, பின் சர்க்கரை, எள்ளு பொடி மற்றும் புளியை சேர்த்து நன்கு கிளறி, இறக்கி குளிர வைக்க வேண்டும்.

* பின்னர் வதக்கிய பொருட்களை மிக்சர் ஜாரில் போட்டு, சிறிது நீரை ஊற்றி நன்கு மென்மையாக அரைத்தால், சுவையான குடைமிளகாய் சட்னி தயார்.

Image Courtesy: yummytummyaarthi