1 கப் கோதுமை மாவு இருந்தா போதும்.. 10 நிமிடத்தில் சூப்பரான ஸ்நாக்ஸ் செய்யலாம்...

Gothumai Maavu Thattai Recipe In Tamil: மாலை வேளையில் உங்கள் குழந்தைகள் காபி, டீ குடிக்கும் போது மொறுமொறுவென்று சாப்பிட ஸ்நாக்ஸ் ஏதாவது கேட்கிறார்களா? ஆனால் வீட்டில் எந்த ஸ்நாக்ஸும் இல்லையா? வீட்டில் கோதுமை மாவு உள்ளதா?

அப்படியானால் அதைக் கொண்டு 10 நிமிடத்தில் ஒரு சுவையான மற்றும் மொறுமொறுப்பான ஸ்நாக்ஸ் செய்யுங்கள். அது தான் தட்டை. இந்த தட்டையை நீங்கள் இதுவரை கடைகளில் தான் வாங்கி சாப்பிட்டிருப்பீர்கள். ஆனால் அதை வீட்டிலேயே ஒரு கப் கோதுமை மாவு கொண்டு செய்யலாம்.

உங்களுக்கு கோதுமை மாவு தட்டையை எப்படி செய்வதென்று தெரிந்து கொள்ள வேண்டுமா? கீழே கோதுமை மாவு தட்டை ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* கோதுமை மாவு - 1 கப்
* உப்பு - சுவைக்கேற்ப
* தனி மிளகாய் தூள் - 1/2 டீஸ்பூன்
* சீரகத் தூள் - 1/4 டீஸ்பூன்
* ஓமம் - 1/2 டீஸ்பூன்
* கசூரி மெத்தி - சிறிது
* எண்ணெய் - 2 டேபிள் ஸ்பூன்
* தண்ணீர் - தேவையான அளவு
* எண்ணெய் - பொரிப்பதற்கு தேவையான அளவு

செய்முறை:

* முதலில் ஒரு பாத்திரத்தில் கோதுமை மாவை எடுத்துக் கொள்ள வேண்டும்.
* பின் அதில் 1/2 டீஸ்பூன் உப்பு, தனி மிளகாய் தூள், சீரகத் தூள் சேர்த்துக் கொள்ள வேண்டும்.
* பின்பு 1/2 டீஸ்பூன் ஓமத்தை கையில் எடுத்து அதை நசுக்கி, மாவுடன் சேர்க்க வேண்டும். அதேப் போல் கசூரி மெத்தியையும் நசுக்கி சேர்க்க வேண்டும்.
* பிறகு அந்த மாவை கையால் கிளறி விட வேண்டும்.
* அடுத்து அதில் 2 டேபிள் ஸ்பூன் எண்ணெய் ஊற்றி பிசைய வேண்டும். பின் தேவையான அளவு நீரை ஊற்றி சப்பாத்தி மாவு பதத்திற்கு நன்கு மென்மையாக பிசைந்து கொள்ள வேண்டும்.
* பின்பு பிசைந்த மாவை மூன்று உருண்டைகளாக பிரித்து உருட்டிக் கொள்ள வேண்டும்.
* பின் ஒரு உருண்டையை எடுத்து, கோதுமை மாவில் பிரட்டி, பின் அதை சப்பாத்தி போன்று சற்று மெலிசாக தேய்த்துக் கொள்ள வேண்டும்.
* பிறகு ஒரு கூர்மையான முனையைக் கொண்ட டப்பா அல்லது டம்ளரை எடுத்து, தேய்த்து வைத்துள்ள சப்பாத்தி மாவின் மேல் அச்சு வைத்து குட்டி குட்டி சப்பாத்திகளாக வெட்டி ஒரு தட்டில் எடுத்து வைத்துக் கொள்ள வேண்டும். இதேப் போன்று அனைத்து மாவையும் செய்து கொள்ள வேண்டும்.
* இறுதியாக ஒரு வாணலியை அடுப்பில் வைத்து, அதில் பொரிப்பதற்கு தேவையான அளவு எண்ணெய் ஊற்றி சூடானதும், தேய்த்து வைத்துள்ள குட்டி சப்பாத்திகளைப் போட்டு பொன்னிறமாக பொரித்து எடுத்தால், மொறுமொறுப்பான கோதுமை தட்டை தயார்.

Image Courtesy: Swasthi's Recipes