விநாயகர் சதுர்த்திக்கு கொழுக்கட்டை செய்யும் போது இந்த 2 பொருளை சேர்த்து செய்யுங்க... டேஸ்ட் சூப்பரா இருக்கும்!

Ganesh Chaturthi 2025 Special Recipes in Tamil: விநாயகர் சதுர்த்தி என்றாலே அனைவருக்கும் முதலில் நினைவிற்கு வருவது கொழுக்கட்டைதான். பிள்ளையாருக்கு மிகவும் பிடித்த உணவுகளில் எப்போதும் முதலிடத்தில் இருப்பது கொழுக்கட்டைதான். இது பிள்ளையாருக்கு மட்டுமல்ல குழந்தைகளுக்கும் மிகவும் பிடித்ததாகும். கொழுக்கட்டை வைத்து விநாயகரை வழிபடும் போது நமது கோரிக்கைகள் அனைத்தும் நிறைவேறும் என்பது பல நூற்றாண்டுகளாக இருக்கும் நம்பிக்கை.

பொதுவாக கொழுக்கட்டை அரிசி மாவில் வெல்லம், தேங்காய், கடலைப்பருப்பு மற்றும் ஏலக்காய் ஆகியவை சேர்த்து தயாரிக்கப்படுகிறது. அதேசமயம் அரிசி மாவில் தேங்காய், பச்சை மிளகாய், கடுகு சேர்த்து தாளித்து கார கொழுகட்டையும் தயாரிக்கப்படுகிறது. ஆனால் வழக்கமான அரிசி மாவுக்கு பதில் ராகி மாவில் கொழுக்கட்டை செய்யும் போது அது சுவையானதாக இருப்பதுடன் ஆரோக்கியமானதாகவும் இருக்கும். இந்த பதிவில் விநாயகர் சதுர்த்திக்கு ராகி மாவை வைத்து எப்படி ஆரோக்கியமான கொழுக்கட்டையை செய்யலாம் என்று தெரிந்து கொள்ளலாம்.

தேவையான பொருட்கள்:

- வெல்லம் - 1 கப்
- தண்ணீர் - 1/4 கப்
- ராகி மாவு - 1 கப்
- பொடித்த அவல் - 1/2 கப்
- துருவிய தேங்காய் - 1 கப்
- பொடித்த வேர்க்கடலை - 1/2 கப்
- நெய் - 2 ஸ்பூன்
- ஏலக்காய் தூள் - 1 ஸ்பூன்

செய்முறை:

- ஒரு அகன்ற பாத்திரத்தில் முதலில் ஒரு கப் அளவு பொடித்த வெல்லத்துடன் கால் கப் அளவு தண்ணீர் ஊற்றி வெல்லத்தை நன்கு கொதிக்க விடவும். வெல்லம் கரைந்து கொதித்து வந்ததும் இறக்கி விடவும்.

- ஒரு அகலமான பாத்திரத்தில் ஒரு கப் அளவு ராகி மாவை நன்றாக வறுத்து கொள்ளவும்.

- ராகி வாசனை வரும் வரை வறுத்து, அரை கப் பொடித்த அவல் சேர்த்து நன்கு கிளறவும்.

- பின்னர் அதில் ஒரு கப் தேங்காய் துருவல் சேர்த்து கலந்து கொள்ளவும்.

- பின்னர் அரை கப் பொடித்த வேர்க்கடலை சேர்த்து நன்கு கலந்து கொள்ளவும்.

- பின்னர் அடுப்பை அணைத்து விட்டு அதில் தனியாக எடுத்து வைத்துள்ள வெல்ல பாகை வடிகட்டி சேர்க்கவும்.

- 2 ஸ்பூன் நெய் மற்றும் சிறிது ஏலக்காய் தூள் சேர்த்து நன்கு கிளறிக் கொள்ளவும்.

- மாவை கொழுக்கட்டை அச்சில் பிடித்த வடிவத்தில் பிடித்து வைக்கவும்.

- இட்லி பாத்திரத்தில் நெய் தடவி, பிடித்த கொழுக்கட்டையை 15 நிமிடம் வேக வைக்கவும் .

- சுவையான மற்றும் ஆரோக்கியமான ராகி கொழுக்கட்டை தயார்.