இனிமேல் மீன் முட்டையை தூக்கிப் போடாம.. இப்படி வறுவல் செய்யுங்க.. வீட்ல எல்லாரும் கேட்டு விரும்பி சாப்பிடுவாங்க

Fish Egg Varuval Recipe In Tamil: உங்கள் வீட்டில் அடிக்கடி மீன் வாங்குவீர்களா? சில சமயங்களில் மீன்களில் முட்டை இருக்குமா? அந்த மீன் முட்டைகளை பெரும்பாலும் தூக்கி எறிந்துவிடுவீர்களா? அப்படியானால் அடுத்தமுறை மீன் முட்டைகளை தூக்கி எறியாமல், அவற்றைக் கொண்டு வறுவல் செய்யுங்கள்.

இந்த மீன் முட்டை வறுவல் மிகவும் சுவையாக இருக்கும். அதுவும் வீட்டில் பெண் குழந்தைகள் இருந்தால், அவர்களுக்கு வாரத்திற்கு 2 முறை மீன் முட்டைகளை செய்து கொடுப்பது நல்லது. இப்படி மீன் முட்டைகளை வறுவல் செய்தால், பிடிக்காதவர்களும் விரும்பி சாப்பிடுவார்கள்.

உங்களுக்கு மீன் முட்டை வறுவலை எப்படி செய்வதென்று தெரிந்து கொள்ள வேண்டுமா? கீழே மீன் முட்டை வறுவல் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

கழுவுவதற்கு...

* மீன் முட்டை - 1/2 கிலோ
* மஞ்சள் தூள் - 1/2 டேபிள் ஸ்பூன்

ஊற வைப்பதற்கு...

* மஞ்சள் தூள் - 1/4 டேபிள் ஸ்பூன்
* எலுமிச்சை - 1
* உப்பு - 1/2 டேபிள் ஸ்பூன்
* இஞ்சி பூண்டு பேஸ்ட் - 2 டேபிள் ஸ்பூன்

பிற பொருட்கள்...

* மிளகாய் தூள் - 1 1/2 டேபிள் ஸ்பூன்
* மல்லித் தூள் - 1 டேபிள் ஸ்பூன்
* சீரகத் தூள் - 1/2 டேபிள் ஸ்பூன்
* மஞ்சள் தூள் - 1/4 டேபிள் ஸ்பூன்
* மிளகுத் தூள் - 1/2 டேபிள் ஸ்பூன்
* எண்ணெய் - 100 கிராம்

செய்முறை:

* முதலில் மீன் முட்டையை நீரில் 3-4 முறை கழுவிக் கொள்ள வேண்டும்.
* பின் கழுவிய மீன் முட்டையில் நீரை ஊற்றி, அதில் 1/2 டேபிள் ஸ்பூன் மஞ்சள் தூள் சேர்த்து கலந்து, 1/2 மணிநேரம் ஊற வைக்க வேண்டும்.
* 1/2 மணிநேரம் கழித்து, மீன் முட்டையை மீண்டும் நீரில் 4-5 முறை கழுவ வேண்டும்.
* அதன் பின் கழுவிய மீன் முட்டைகளை எடுத்து, அதன் மேல் மசாலா இறங்குவதற்காக கீறல்களைப் போட வேண்டும்.
* பின் அந்த மீன் முட்டையில் 1/4 டேபிள் ஸ்பூன் மஞ்சள் தூள், 1 எலுமிச்சையின் சாறு, 1/2 டேபிள் ஸ்பூன் உப்பு மற்றும் 2 டேபிள் ஸ்பூன் இஞ்சி பூண்டு பேஸ்ட் சேர்த்து பிரட்டி, 1/2 மணிநேரம் ஊற வைக்க வேண்டும். இப்படி ஊற வைப்பதன் மூலம் முட்டையின் கவுச்சு நீங்கும்.
* 1/2 மணிநேரம் கழித்து, அத்துடன் 1 1/2 டேபிள் ஸ்பூன் மிளகாய் தூள், 1 டேபிள் ஸ்பூன் மல்லித் தூள், 1/2 டேபிள் ஸ்பூன் சீரகத் தூள், 1/4 டேபிள் ஸ்பூன் மஞ்சள் தூள், 1/2 டேபிள் ஸ்பூன் மிளகுத் தூள் சேர்த்து பிரட்ட வேண்டும்.
* இறுதியாக ஒரு பேனை அடுப்பில் வைத்து, அதில் 100 கிராம் எண்ணெய் ஊற்றி சூடானதும், தீயைக் குறைத்து, பிரட்டி வைத்துள்ள மீன் முட்டைகளை சேர்த்து, பிரட்டி விட்டு 5 நிமிடம் வேக வைத்து எடுத்தால், சுவையான மீன் முட்டை வறுவல் தயார்.