ஈரோடு ஸ்பெஷல் ஜப்பான் சிக்கன்

Erode Special Japan Chicken: இன்று உங்கள் வீட்டில் சிக்கன் செய்ய நினைக்கிறீர்களா? அதுவும் சற்று வித்தியாசமான சுவையைக் கொண்ட சிக்கனை செய்ய விரும்புகிறீர்களா? அப்படியானால் ஈரோடு ஸ்பெஷல் ஜப்பான் சிக்கனை செய்யுங்கள். இந்த ஜப்பான் சிக்கன் நன்கு க்ரீமியாக ருசியாக இருக்கும்.

இந்த ஜப்பான் சிக்கன் ஈரோடு பகுதியில் உள்ள ஒரு மெஸ்ஸில் மிகவும் பிரபலமானது. முக்கியமாக இந்த ரெசிபி செய்வது மிகவும் சுலபம்.நீங்கள் இந்த ஈரோடு ஜப்பான் சிக்கனை வீட்டில் செய்ய நினைக்கிறீர்களா?

கீழே ஈரோடு ஸ்பெஷல் ஜப்பான் சிக்கன் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* வெண்ணெய் - 1 டேபிள் ஸ்பூன்
* பூண்டு - 10 பல் (பொடியாக நறுக்கியது)
* பச்சை மிளகாய் - 5 (கீறியது)
* பால் - 2 கப்
* முந்திரி - 1/4 கப் (பொடி செய்தது)
* உப்பு - சுவைக்கேற்ப
* வெள்ளை மிளகுத் தூள் - 1 டீஸ்பூன்

சிக்கனுக்கு...

* எலும்பில்லாத சிக்கன் - 500 கிராம்
* உப்பு - சுவைக்கேற்ப
* வெள்ளை மிளகுத் தூள் - 1 டீஸ்பூன்
* மைதா - 2 டேபிள் ஸ்பூன்
* சோள மாவு - 4 டேபிள் ஸ்பூன்
* எண்ணெய் - பொரிப்பதற்கு தேவையான அளவு

செய்முறை:

* முதலில் சிக்கனை நன்கு கழுவி, ஒரு பௌலில் எடுத்துக் கொள்ள வேண்டும்.
* பின் அதில் உப்பு, மிளகுத் தூள் சேர்த்து கிளறி, சோள மாவு, மைதா மற்றும் சிறிது நீரைத் தெளித்து சற்று கெட்டியாக பிசைந்து கொள்ள வேண்டும்.
* பின்பு ஒரு வாணலியை அடுப்பில் வைத்து, அதில் பொரிப்பதற்கு தேவையான அளவு எண்ணெய் ஊற்றி சூடேற்ற வேண்டும்.
* எண்ணெய் சூடானதும், பிசைந்து வைத்துள்ள சிக்கன் துண்டுகளை சேர்த்து பொன்னிறமாக பொரித்து தனியாக வைத்துக் கொள்ள வேண்டும்.
* பிறகு ஒரு வாணலியை அடுப்பில் வைத்து, அதில் வெண்ணெய் சேர்க்க வேண்டும்.
* பின் அதில் பூண்டு சேர்த்து சில நொடிகள் வதக்க வேண்டும்.
* அடுத்து அதில் பச்சை மிளகாயை சேர்த்து வதக்கி, பால், முந்திரி பொடி, உப்பு மற்றும் மிளகுத் தூள் சேர்த்து நன்கு கிளற வேண்டும்.
* பின்னர் அதில் பொரித்த சிக்கன் துண்டுகளை சேர்த்து நன்கு 3-4 நிமிடம் நன்கு சாஸ் சுண்டும் வரை கிளறி இறக்கினால், சுவையான ஈரோடு ஜப்பான் சிக்கன் தயார்.

Image Courtesy: yummytummyaarthi