மதியம் சாதத்துக்கு ஒரு டைம் முட்டையை இப்படி கிரேவி செஞ்சு சாப்பிடுங்க... அப்புறம் பாருங்க அடிக்கடி செய்வீங்க..

Egg Pepper Gravy Recipe In Tamil: மதிய வேளையில் சாதத்துக்கு என்ன குழம்பு செய்வதென்று யோசித்துக் கொண்டிருக்கிறீர்களா? அதுவும் வாய்க்கு ருசியான ஒரு சைடு டிஷ் செய்ய நினைக்கிறீர்களா? உங்கள் வீட்டில் முட்டை உள்ளதா?

அப்படியானால் அந்த முட்டையைக் கொண்டு பெப்பர் கிரேவி செய்யுங்கள். இந்த முட்டை பெப்பர் கிரேவி சாதத்திற்கு மட்டுமின்றி, சப்பாத்தி, பூரியுடன் சாப்பிடவும் நன்றாக இருக்கும். முக்கியமாக இந்த கிரேவி செய்வதென்று மிகவும் சுலபமாக இருக்கும்.

உங்களுக்கு முட்டை பெப்பர் கிரேவியை எப்படி செய்வதென்று தெரிந்து கொள்ள வேண்டுமா? கீழே முட்டை பெப்பர் கிரேவி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

வறுத்து அரைப்பதற்கு...

* எண்ணெய் - 1 டேபிள் ஸ்பூன்
* பட்டை - 1 துண்டு
* கிராம்பு - 3
* ஏலக்காய் - 1
* பிரியாணி இலை - 1
* மல்லி - 2 டேபிள் ஸ்பூன்
* மிளகு - 1 டேபிள் ஸ்பூன்
* சீரகம் - 1/2 டீஸ்பூன்
* சோம்பு - 1/2 டீஸ்பூன்
* வரமிளகாய் - 3
* துருவிய தேங்காய் - 3 டேபிள் ஸ்பூன்

கிரேவிக்கு...

* எண்ணெய் - 2 டேபிள் ஸ்பூன்
* சோம்பு - 1/2 டீஸ்பூன்
* வெங்காயம் - 2
* கறிவேப்பிலை - 1 கொத்து
* தக்காளி - 2 (பொடியாக நறுக்கியது)
* இஞ்சி பூண்டு பேஸ்ட் - 1 1/2 டீஸ்பூன்
* உப்பு - சுவைக்கேற்ப
* மஞ்சள் தூள் - 1/4 டீஸ்பூன்
* தண்ணீர் - தேவையான அளவு
* முட்டை - 4 (வேக வைத்தது)
* கொத்தமல்லி - சிறிது

செய்முறை:

* முதலில் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், பட்டை, கிராம்பு, ஏலக்காய், பிரியாண இலை, மல்லி, மிளகு, சீரகம், சோம்பு, வரமிளகாய் சேர்த்து நல்ல மணம் வரும் வரை வறுக்க வேண்டும்.
* பின் அதில் துருவிய தேங்காயை சேர்த்து 1 நிமிடம் வதக்கி இறக்கி குளிர வைத்து, மிக்சர் ஜாரில் போட்டு, சிறிது நீரை ஊற்றி நன்கு மென்மையாக அரைத்து பேஸ்ட் செய்து கொள்ள வேண்டும்.
* பின்னர் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், சோம்பு சேர்த்து தாளிக்க வேண்டும்.
* பின்பு அதில் பொடியாக நறுக்கிய வெங்காயம் மற்றும் கறிவேப்பிலை சேர்த்து பொன்னிறமாக வதக்க வேண்டும்.
* பிறகு அதில் பொடியாக நறுக்கிய தக்காளி மற்றும் இஞ்சி பூண்டு பேஸ்ட் சேர்த்து நன்கு மென்மையாகும் வரை வதக்க வேண்டும்.
* பின் அதில் அரைத்து வைத்துள்ள மசாலாவை சேர்த்து, சுவைக்கேற்ப உப்பு, மஞ்சள் தூள் சேர்த்து 5 நிமிடம் வதக்க வேண்டும்.
* அதன் பின் அதில் கிரேவிக்கு தேவையான அளவு நீரை ஊற்றி நன்கு கலந்து, 10 நிமிடம் மூடி வைத்து கொதிக்க வைக்க வேண்டும்.
* இறுதியாக அதில் வேக வைத்துள்ள முட்டையை கீறி விட்டோ அல்லது இரண்டாக வெட்டியோ சேர்த்து கிளறி, குறைவான தீயில் வைத்து, மூடி வைத்து 3 நிமிடம் கொதிக்க வைத்து இறக்கி, கொத்தமல்லியைத் தூவினால், சுவையான முட்டை மிளகு கிரேவி தயார்.

Image Courtesy: Apoorvaa's Nalabagam