சப்பாத்திக்கு 2 முட்டை வெச்சு ஒருமுறை இந்த மசாலா செய்யுங்க.. டேஸ்ட் வேற லெவல்-ல இருக்கும்...

Egg Kheema Masala Recipe In Tamil: இரவு உங்கள் வீட்டில் பெரும்பாலும் சப்பாத்தி தான் செய்வீர்களா? அந்த சப்பாத்திக்கு என்ன சைடு டிஷ் செய்வதென்று யோசித்துக் கொண்டிருக்கிறீர்களா? வழக்கமாக செய்யும் சைடு டிஷ் போரடித்துவிட்டதா? சற்று வித்தியாசமாக செய்ய விரும்புகிறீர்களா?

உங்கள் வீட்டில் 2 முட்டை உள்ளதா? அப்படியானால் அந்த முட்டைகளைக் கொண்டு கீமா மசாலா செய்யுங்கள். இந்த முட்டை கீமா மசாலா செய்வதற்கு சுலபமாக இருப்பதோடு, வீட்டில் உள்ளோர் விரும்பி சாப்பிடுமாறு ருசியாக இருக்கும்.

உங்களுக்கு முட்டை கீமா மசாலாவை எப்படி செய்வதென்று தெரிந்து கொள்ள வேண்டுமா? கீழே முட்டை கீமா மசாலாவின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளங்கள்.

தேவையான பொருட்கள்:

* வேக வைத்த முட்டை - 2
* எண்ணெய் - 1 டேபிள் ஸ்பூன்
* இஞ்சி - 1 இன்ச்
* பூண்டு - 3-4 பல்
* பச்சை மிளகாய் - 2
* கறிவேப்பிலை - 1 கொத்து
* வெங்காயம் - 2
* உப்பு - சுவைக்கேற்ப
* இஞ்சி பூண்டு பேஸ்ட் - 1 டீஸ்பூன்
* மிளகாய் தூள் - 3/4 டீஸ்பூன்
* மஞ்சள் தூள் - 1/4 டீஸ்பூன்
* கரம் மசாலா - 1/4 டீஸ்பூன்
* மல்லித் தூள் - 1/2 டீஸ்பூன்
* மிளகுத்தூள் - 1/2 டீஸ்பூன்
* சீரகத் தூள் - 1/4 டீஸ்பூன்
* தக்காளி - 2 (அரைத்தது)
* தண்ணீர் - தேவையான அளவு
* கொத்தமல்லி - சிறிது

செய்முறை:

* முதலில் வேக வைத்த முட்டைகளை துருவிக் கொள்ள வேண்டும்.
* பின்னர் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், பொடியாக நறுக்கிய இஞ்சி, பூண்டு, பச்சை மிளகாய், கறிவேப்பிலை சேர்த்து தாளிக்க வேண்டும்.
* பின்பு அதில் பொடியாக நறுக்கிய வெங்காயத்தை சேர்த்து சிறிது உப்பு தூவி, வெங்காயத்தை கண்ணாடி பதத்திற்கு வதக்க வேண்டும்.
* பிறகு அதில் இஞ்சி பூண்டு பேஸ்ட் சேர்த்து பச்சை வாசனை போக வதக்க வேண்டும்.
* அடுத்து அதில் மிளகாய் தூள், மல்லித் தூள், மஞ்சள் தூள், கரம் மசாலா, மிளகுத் தூள், சீரகத் தூள் சேர்த்து குறைவான தீயில் வைத்து சிறிது நேரம் கிளறி விட வேண்டும்.
* பின் அதில் அரைத்து வைத்துள்ள தக்காளியை சேர்த்து, பச்சை வாசனை போக கிளறி விட்டு வேக வைக்க வேண்டும்.
* பின் தேவையான அளவு நீரை ஊற்றி, பச்சை வாசனை போக நன்கு கொதிக்க வைக்க வேண்டும்.
* இறுதியாக துருவிய முட்டையை சேர்த்து நன்கு கிளறி, 1 கொதி விட்டு, கொத்தமல்லியைத் தூவி இறக்கினால், சுவையான முட்டை கீமா மசாலா தயார்.