வெறும் 3 பொருள் இருந்தா போதும்.. தீபாவளிக்கு அட்டகாசமான பலகாரம் செய்யலாம்... அதென்ன-ன்னு பாருங்க...

Diwali Special Maida Biscuit Recipe In Tamil: தீபாவளிக்கு வீட்டில் நிறைய பலகாரங்களை செய்ய நினைக்குறீங்களா? அதுவும் அதிகம் சிரமப்படாம அனைவரும் விரும்பி சாப்பிடுமாறான பலகாரங்களை செய்ய ஆசைப்படுகிறீர்களா?

தீபாவளி பலகாரம் என்றாலே முதலில் முறுக்கு, தட்டை, குலாப் ஜாமூன், லட்டு போன்றவற்றை செய்வோம். இது தவிர தீபாவளிக்கு மைதா பிஸ்கட்டை கூட செய்யலாம். இந்த பிஸ்கட் செய்வதற்கு வெறும் 3 பொருட்களே போதும். 15 நிமிடத்தில் செய்துவிடலாம். முக்கியமாக இதுவரை பலகாரம் செய்யாதவர்கள் கூட இதை அருமையான சுவையில் செய்யலாம்.

உங்களுக்கு மைதா பிஸ்கட்டை எப்படி செய்வதென்று தெரிந்து கொள்ள வேண்டுமா? கீழே மைதா பிஸ்கட் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* வெதுவெதுப்பான நீர் - 1/4 கப்
* சர்க்கரை - 1/2 கப்
* உப்பு - 1 சிட்டிகை
* நெய் - 1/4 கப்
* மைதா - 2 கப்
* எண்ணெய் - பொரிப்பதற்கு தேவையான அளவு

செய்முறை:

* முதலில் ஒரு பௌலில் 1/4 கப் வெதுவெதுப்பான நீரை ஊற்றி, அதில் 1/2 கப் சர்க்கரை மற்றும் 1 சிட்டிகை உப்பு சேர்த்து, சர்க்கரையை நன்கு கரைத்துக் கொள்ள வேண்டும்.
* பின் அதில் 1/4 கப் நெய் ஊற்றி நன்கு கலந்து கொள்ள வேண்டும்.
* பின்பு அதில் 2 கப் மைதா மாவை சேர்த்துக் கொள்ள வேண்டும்.
* பிறகு அதை கைகளால் நன்கு மென்மையாக பிசைந்து விட வேண்டும்.
* மாவை நன்கு மென்மையாக சப்பாத்தி மாவு பதத்திற்கு பிசைந்ததும், அந்த மாவை இரண்டாக பிரித்து உருட்டிக் கொள்ள வேண்டும்.
* பின் ஒரு உருண்டையை எடுத்து, சப்பாத்தி கட்டையில் வைத்து சற்று மொத்தமாக தேய்த்துக் கொள்ள வேண்டும்.
* பின்பு கத்தியால் அதை சிறுசிறு சதுரத் துண்டுகளாக வெட்டிக் கொள்ள வேண்டும்.
* இதேப் போன்று மற்றொரு உருண்டையையும் தேய்த்து, துண்டுகளாக்கி தனியாக வைத்துக் கொள்ள வேண்டும்.
* இறுதியாக ஒரு வாணலியை அடுப்பில் வைத்து, அதில் பொரிப்பதற்கு தேவையான அளவு எண்ணெய் ஊற்றி சூடானதும், குறைவான தீயில் வைத்து, துண்டுகளாக்கப்பட்ட மைதாவை சேர்த்து பொன்னிறமாக பொரித்து எடுத்தால், சுவையான மைதா பிஸ்கட் தயார்.