தீபாவளி ஸ்பெஷல் குலாப் ஜாமூன் மிக்ஸ் அல்வா

நீங்கள் தீபாவளி பண்டிகைக்கு வீட்டில் பலகாரம் செய்யும் பழக்கம் கொண்டவரா? இந்த வருட தீபாவளிக்கு ஒரு வித்தியாசமான பலகாரம் செய்து உங்கள் வீட்டில் உள்ளோரை அசத்த நினைக்கிறீர்களா? அப்படியானால் குலாப் ஜாமூன் மிக்ஸ் அல்வா செய்யுங்கள். இந்த அல்வா செய்வது மிகவும் சுலபம் மற்றும் அனைவரும் விரும்பி சாப்பிடும் வகையில் ருசியாக இருக்கும். முக்கியமாக பண்டிகை என்றால் அனைவரது வீட்டிலும் குலாப் ஜாமூன் மிக்ஸ் வாங்கி குலாப் ஜாமூன் செய்வோம். ஆனால் இந்த வருடம் சற்று வித்தியாசமாக குலாப் ஜாமூன் மிக்ஸ் அல்வா செய்யுங்கள்.

உங்களுக்கு குலாப் ஜாமூன் மிக்ஸ் அல்வா எப்படி செய்வதென்று தெரிந்து கொள்ள வேண்டுமா? கீழே குலாப் ஜாமூன் மிக்ஸ் அல்வா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* குலாப் ஜாமூன் மிக்ஸ் - 1 கப்

* தண்ணீர் - 1 1/2 கப்

* நாட்டுச் சர்க்கரை - 1/2 கப்

* முந்திரி - 2 டேபிள் ஸ்பூன் (உடைத்தது)

* நெய் - 1/4 கப்

* ஏலக்காய் பொடி - 1/4 டீஸ்பூன்

செய்முறை:

* முதலில் மேலே கொடுக்கப்பட்டுள்ள பொருட்கள் அனைத்தையும் தயாராக எடுத்து வைத்துக் கொள்ள வேண்டும்.

* பின் ஒரு பாத்திரத்தில் குலாப் ஜாமூன் மிக்ஸ், நாட்டுச் சர்க்கரை மற்றும் நீர் சேர்த்து கட்டிகளின்றி நன்கு கலந்து தனியாக வைத்துக் கொள்ள வேண்டும்.

* பின்பு ஒரு வாணலியை அடுப்பில் வைத்து, அதில் நெய் ஊற்றி சூடானதும், முந்திரியை சேர்த்து பொன்னிறமாக வறுத்து, தனியாக ஒரு தட்டில் வைத்துக் கொள்ள வேண்டும்.

* பிறகு அதே வாணலியில் கலந்து வைத்துள்ள குலாப் ஜாமூன் மிக்ஸ் கலவையை ஊற்றி குறைவான தீயில் வைத்து நன்கு கட்டிகளின்றி கிளறி விட வேண்டும்.

* கலவையானது கெட்டியாக ஆரம்பிக்கும் போது, சிறிது நெய்யை ஊற்றி, குறைவான தீயில் வைத்து, பாத்திரத்தில் ஒட்டாமல் அல்வா பதத்திற்கு வரும் வரை கிளறி விட வேண்டும்.

* கலவை அல்வா பதத்திற்கு வந்ததும் மீதமுள்ள நெய்யை ஊற்றி கிளறி, வறுத்த முந்திரி, ஏலக்காய் பொடி சேர்த்து நன்கு கிளறி இறக்கினால், குலாப் ஜாமூன் மிக்ஸ் அல்வா தயார்.

Image Courtesy: sharmispassions