தாபா ஸ்டைல் தயிர் சிக்கன் ரெசிபி... ஒரு தடவ செஞ்சு பாருங்க... தோசை, சப்பாத்திக்கு தாறுமாறா இருக்கும்...!

Dhaba Style Curd Chicken Recipe in Tamil: இந்த வார விடுமுறையில் உங்கள் வீட்டில் சிக்கன் வாங்கி சமைக்கப் போகிறீர்களா? அதுவும் காலையில் பூரி செய்து சிக்கன் கிரேவி செய்து சாப்பிட திட்டமிட்டுள்ளீர்களா? அப்படியானால் ஒரே மாதிரி சிக்கன் கிரேவியை செய்யாமல், ஒருமுறை இந்த தாபா ஸ்டைல் தயிர் சிக்கன் கிரேவியை செய்யிங்கள்.

இந்த சிக்கன் கிரேவி பூரி, சப்பாத்தியுடன் மட்டுமின்றி, சாதத்துடன் சேர்த்து சாப்பிடவும் அருமையாக இருக்கும். முக்கியமாக இந்த மாதிரி சிக்கன் கிரேவியை செய்தால், பின் உங்கள் வீட்டில் உள்ளோர் எப்போதும் இந்த மாதிரி தான் சிக்கன் கிரேவியை செய்ய சொல்வார்கள். இன்று உங்கள் வீட்டில் உள்ளோரை அசத்த நினைத்தால், இந்த கிரேவியை செய்து கொடுங்கள்.

உங்களுக்கு தாபா ஸ்டைல் தயிர் சிக்கன் கிரேவியை எப்படி செய்வதென்று தெரிந்து கொள்ள வேண்டுமா? கீழே தயிர் சிக்கன் கிரேவி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

- 2 டேபிள்ஸ்பூன் எண்ணெய் அல்லது நெய்
- 1 டீஸ்பூன் சீரகம்
- 1 இன்ச் இலவங்கப்பட்டை
- 2 பெரிய வெங்காயம், நறுக்கியது
- 3 பச்சை மிளகாய்
- 2 டேபிள் ஸ்பூன் இஞ்சி பூண்டு விழுது
- 1 கப் தயிர்
- 1 டேபிள் ஸ்பூன் சீரகத்தூள்
- 1 டீஸ்பூன் மிளகாய் தூள்
- 2 டீஸ்பூன் கரம் மசாலா தூள்
- 1 டேபிள் ஸ்பூன் கசூரி மேத்தி
- 4 டேபிள் ஸ்பூன் நறுக்கிய கொத்தமல்லி

சிக்கனை வதக்க:

- அரை கிலோ சிக்கன்
- 1 டீஸ்பூன் மஞ்சள் தூள்
- 1 டீஸ்பூன் இஞ்சி பூண்டு விழுது
- தேவையான அளவு உப்பு
- 2 டேபிள் ஸ்பூன் எண்ணெய்

செய்முறை:

- தயிரை ஒரு பாத்திரத்தில் ஊற்றி நன்றாக கலக்கவும்.

- ஒரு பாத்திரத்தில் 2 டேபிள் ஸ்பூன் எண்ணெயை சூடாக்கி, அதில் கழுவிய சிக்கன் மற்றும் உப்பு சேர்க்கவும்.

- பின்னர் இஞ்சி பூண்டு விழுது மற்றும் மஞ்சள் தூள் சேர்த்து சிக்கனை வதக்கவும். சிக்கன் அனைத்து பக்கங்களிலும் வதங்கும் வரை அதிக வெப்பத்தில் வதக்கவும். சிக்கனை 10 நிமிடங்கள் வதக்கி, ஒரு கிண்ணத்தில் எடுத்து ஒதுக்கி வைக்கவும்.

- பின் அதே கடாயில், மேலும் 2 டேபிள்ஸ்பூன் எண்ணெய் சேர்த்து, சீரகம் மற்றும் இலவங்கப்பட்டை சேர்க்கவும்.

- பின்னர் நறுக்கிய வெங்காயம் சேர்த்து, பொன்னிறமாகும் வரை வதக்கவும். இதைத் தொடர்ந்து பச்சை மிளகாய், இஞ்சி பூண்டு விழுது சேர்த்து பச்சை வாசனை போகும் வரை வதக்கவும்.

- இப்போது மிளகாய் தூள், கரம் மசாலா, சீரகத் தூள் மற்றும் உப்பு சேர்த்து நன்கு கலக்கவும்.

- மசாலா பச்சை வாசனை போனவுடன் வதக்கிய சிக்கனை சேர்த்து மசாலாவுடன் நன்கு கிளறவும்.

- பின்னர் தயிர் சேர்த்து நன்கு கலக்கவும். அதன்பின் மூடி வைத்து, சிக்கன் வேகும் வரை 10 முதல் 15 நிமிடங்கள் வேக வைக்கவும்.

- இறுதியாக கசூரி மேத்தி மற்றும் கொத்தமல்லி தூவி இறக்கினால் சுவையான தாபா ஸ்டைல் தயிர் சிக்கன் ரெடி!