குழந்தைகள் விரும்பி சாப்பிடும்... மொறுமொறுப்பான... ராகி போண்டா

மாலை வேளையில் காபி, டீ குடிக்கும் போது உங்கள் வீட்டில் உள்ளோர் மொறுமொறுப்பாகவும், சூடாகவும் ஸ்நாக்ஸ் ஏதாவது சாப்பிட கேட்கிறார்களா? உங்கள் வீட்டில் இட்லி மாவு மற்றும் ராகி மாவு உள்ளதா? அப்படியானால் ராகி போண்டா செய்து கொடுங்கள். இந்த ராகி போண்டா செய்வது மிகவும் சுலபம் மற்றும் காபி, டீயுடன் சேர்த்து சாப்பிட அற்புதமாக இருக்கும். மேலும் இதை மாலை வேளையில் பள்ளி முடிந்து பசியுடன் வரும் குழந்தைகளுக்கும் செய்து கொடுக்கலாம். இது நிச்சயம் குழந்தைகள் விரும்பி சாப்பிடும் வகையில் ருசியாக இருக்கும்.

உங்களுக்கு ராகி போண்டா எப்படி எளிய முறையில் செய்வதென்று தெரிந்து கொள்ள வேண்டுமா? கீழே ராகி போண்டா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* இட்லி மாவு - 2 கப்

* சிறிய கேரட் - 1

* பெரிய வெங்காயம் - 1

* பச்சை மிளகாய் - 1

* ராகி மாவு - 1/2 கப் முதல் 3/4 கப் வரை

* இஞ்சி - 1 இன்ச் துண்டு

* கறிவேப்பிலை - சிறிது

* உப்பு - சுவைக்கேற்ப

* மிளகுத் தூள் - சுவைக்கேற்ப

* எண்ணெய் - பொரிப்பதற்கு தேவையான அளவு

செய்முறை:

* முதலில் கேரட்டை எடுத்து அதன் தோலை நீக்கிவிட்டு, அதை பொடியாக நறுக்கிக் கொள்ள வேண்டும்.

* பின் வெங்காயத்தை எடுத்து அதன் தோலை நீக்கிவிட்டு, அதையும் பொடியாக நறுக்கிக் கொள்ள வேண்டும்.

* பின்பு பச்சை மிளகாய் மற்றும் இஞ்சியை நன்கு பொடியாக நறுக்கிக் கொள்ள வேண்டும்.

* பிறகு ஒரு பாத்திரத்தில் 2 கப் இட்லி மாவை எடுத்துக் கொள்ள வேண்டும். பின் அதில் பொடியாக நறுக்கிய கேரட், வெங்காயம், பச்சை மிளகாய், இஞ்சி ஆகியவற்றை சேர்த்துக் கொள்ள வேண்டும்.

* பின்னர் அதில் கறிவேப்பிலை, ராகி மாவு, சுவைக்கேற்ப உப்பு மற்றும் மிளகுத் தூள் சேர்த்து நன்கு போண்டா மாவு பதத்திற்கு கலந்து கொள்ள வேண்டும்.

* பின் ஒரு வாணலியை அடுப்பில் வைத்து, அதில் பொரிப்பதற்கு தேவையான அளவு எண்ணெய் ஊற்றி சூடேற்ற வேண்டும்.

* எண்ணெய் சூடானதும், போண்டா மாவை சிறிது சிறிதாக எடுத்து எண்ணெயில் போட்டு பொன்னிறமாக பொரித்து எடுத்தால், சுவையான ராகி போண்டா தயார்.

Image Courtesy: yummytummyaarthi