தோசைக்கு ஒருமுறை இந்த கோயம்புத்தூர் ஸ்பெஷல் பீர்க்கங்காய் கடையல் சட்னியை செஞ்சு பாருங்க..

Coimbatore Special Ridge Gourd Chutney In Tamil: காலையில் உங்கள் வீட்டில் தோசை சுட போகிறீர்களா? அந்த தோசைக்கு சும்மா நச்சுன்னு ஒரு சைடு டிஷ் செய்ய நினைக்கிறீங்களா? தினமும் ஒரே மாதிரி சைடு டிஷ் செய்து போரடித்துவிட்டதா? உங்கள் வீட்டில் பீர்க்கங்காய் உள்ளதா? அப்படியானால் அந்த பீர்க்கங்காய் கொண்டு கோயம்புத்தூர் ஸ்பெஷல் பீர்க்கங்காய் கடையல் சட்னியை செய்யுங்கள்.

கோயம்புத்தூரில் உள்ள பெரும்பாலான வீடுகளில் தோசை, இட்லிக்கு இந்த சட்னியை தான் அடிக்கடி செய்வார்களாம். முக்கியமாக இந்த சட்னி 10 நிமிடத்தில் செய்யக்கூடிய வகையில் ஈஸியாக இருக்கும். மேலும் இது குழந்தைகள் முதல் பெரியவர்கள் வரை விரும்பி சாப்பிடக்கூடியவாறும் இருக்கும்.

உங்களுக்கு கோயம்புத்தூர் ஸ்பெஷல் பீர்க்கங்காய் கடையல் சட்னியை எப்படி செய்வதென்று தெரிந்து கொள்ள வேண்டுமா? கீழே கோயம்புத்தூர் ஸ்பெஷல் பீர்க்கங்காய் கடையல் சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* பிஞ்சு பீர்க்கங்காய் - 1 (நீளமானது)
* எண்ணெய் - 2 டீஸ்பூன்
* சீரகம் - 1 டீஸ்பூன்
* மல்லி விதை - 1 டீஸ்பூன்
* கறிவேப்பிலை - 1 கொத்து
* சின்ன வெங்காயம் - 10-15 (நறுக்கியது)
* பச்சை மிளகாய் - 2
* தக்காளி - 4 (நறுக்கியது)
* மஞ்சள் தூள் - 1/4 டீஸ்பூன்
* சாம்பார் தூள் - 3/4 டீஸ்பூன்
* உப்பு - சுவைக்கேற்ப
* தண்ணீர் - 1 1/2 டம்ளர்
* கொத்தமல்லி - சிறிது

செய்முறை:

* முதலில் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், சீரகம், மல்லி விதைகளை சேர்த்து தாளிக்க வேண்டும்.
* பின் அதில் கறிவேப்பிலை, நறுக்கிய சின்ன வெங்காயம், பச்சை மிளகாய் சேர்த்து நன்கு வதக்க வேண்டும்.
* பின்பு அதில் நறுக்கிய தக்காளியை சேர்த்து 1 நிமிடம் வதக்க வேண்டும்.
* அதன் பின் அதில் பீர்க்கங்காயை சேர்த்து, அத்துடன் மஞ்சள் தூள், சாம்பார் தூள் மற்றும் சுவைக்கேற்ப உப்பு சேர்த்து கிளறி, 1 1/2 டம்ளர் நீரை ஊற்றி கிளறி, மூடி வைத்து 10 நிமிடம் வேக வைக்க வேண்டும்.
* 10 நிமிடம் கழித்து, மூடியைத் திறந்து, அதில் கொத்தமல்லியைத் தூவி கிளறி அடுப்பை அணைத்துவிட்டு, குளிர வைக்க வேண்டும்.
* பிறகு மத்து கொண்டு அவற்றை கடைந்து விடலாம் அல்லது மிக்சர் ஜாரில் போட்டு ஒருமுறை அடித்துக் கொள்ளலாம். இப்போது சுவையான கோயம்புத்தூர் ஸ்பெஷல் பீர்க்கங்காய் கடையல் சட்னி தயார்.

Image Courtesy: Kavitha Samayalarai கவிதா சமையலறை