தேங்காய் தயிர் சட்னி

இதுவரை நீங்கள் இட்லி, தோசைக்கு தேங்காய் சட்னி செய்து சுவைத்திருப்பீர்கள். தேங்காய் சட்னியிலேயே பல வெரைட்டிகள் உள்ளன. அதில் சிலர் பச்சை மிளகாய் சேர்த்து தேங்காய் சட்னியும், இன்னும் சிலர் வரமிளகாய் சேர்த்தும் தேங்காய் சட்னியும் செய்வதுண்டு. ஆனால் இன்னும் ஒரு வித்தியாசமான தேங்காய் சட்னி உள்ளது. அது தான் தேங்காய் தயிர் சட்னி. இந்த தேங்காய் தயிர் சட்னி இட்லி, தோசையுடன் மட்டுமின்றி, ஊத்தாப்பம், மெதுவடை போன்றவற்றுடன் சேர்த்து சாப்பிடவும் அற்புதமாக இருக்கும். இந்த சட்னி பேச்சுலர்களும் செய்யும் வகையில் ஈஸியாக இருக்கும்.

உங்களுக்கு தேங்காய் தயிர் சட்னி எப்படி செய்வதென்று கொடுக்கப்பட்டுள்ளது. கீழே தேங்காய் தயிர் சட்னியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* துருவிய தேங்காய் - 1/2 கப்

* பொட்டுக்கடலை - 4 டேபிள் ஸ்பூன்

* தயிர் - 4 டேபிள் ஸ்பூன்

* இஞ்சி - 1/2 இன்ச் (பொடியாக நறுக்கியது)

* பச்சை மிளகாய்- 1-2

* தண்ணீர் - தேவையான அளவு

* உப்பு - சுவைக்கேற்ப

தாளிப்பதற்கு...

* கறிவேப்பிலை - சிறிது

* கடுகு - 1 டீஸ்பூன்

* பெருங்காயத் தூள் - 1 சிட்டிகை

* வரமிளகாய் - 1-2

* எண்ணெய் - 1 டேபிள் ஸ்பூன்

செய்முறை:

* முதலில் ஒரு பாத்திரத்தில் தயிரை ஊற்றி நன்கு மென்மையாக அடித்துக் கொள்ள வேண்டும்.

* பின்பு மிக்சர் ஜாரில் துருவிய தேங்காய், பொட்டுக் கடலை, பச்சை மிளகாய், இஞ்சி, சுவைக்கேற்ப உப்பு மற்றும் தேவையான அளவு நீரை ஊற்றி நன்கு அரைத்துக் கொள்ள வேண்டும்.

* பிறகு அரைத்த சட்னியை தயிருடன் சேர்த்து கலந்து கொள்ள வேண்டும்.

* பின்னர் ஒரு சிறு வாணலியை அடுப்பில் வைத்து, அதில் எண்ணெய் ஊற்றி சூடேற்ற வேண்டும்.

* எண்ணெய் சூடானதும், கடுகு, வரமிளகாய், கறிவேப்பிலை மற்றும் பெருங்காயத் தூள் சேர்த்து தாளிக்க வேண்டும்.

* பின் தாளித்ததை சட்னியில் ஊற்றி கிளறினால், தேங்காய் தயிர் சட்னி தயார்.

Image Courtesy: vegrecipesofindia