கிறிஸ்துமஸ் ஸ்பெஷல்: சீஸ்கேக் ப்ரௌனீஸ்

கிறிஸ்துமஸ் பண்டிகையையொட்டி உங்கள் வீட்டில் ஒரு ஸ்பெஷலான மற்றும் சுவையான கேக் செய்ய விரும்புகிறீர்களா? வழக்கமாக செய்யும் கேக்கை விட, இந்த ஆண்டு சற்று வித்தியாசமாக ப்ரௌனீஸ் செய்யுங்கள். அதுவும் சீஸ்கேக் ப்ரௌனீஸ் செய்யுங்கள். ப்ரௌனீஸ் பஞ்சு போன்று மிகவும் மென்மையாக, சாக்லேட் சுவையுடன் இருக்கும். எனவே இந்த ப்ரௌனீஸ் குழந்தைகளுக்கு பிடித்தவாறு ருசியாக இருக்கும். நீங்கள் இதுவரை கடைகளில் ப்ரௌனீஸ் வாங்கி சுவைத்திருந்தால், இந்த கிறிஸ்துமஸ் பண்டிகையன்று அதை வீட்டிலேயே செய்து சாப்பிடுங்கள். இது செய்வதற்கு சுலபமாக இருக்கும்.

உங்களுக்கு சீஸ் பேக் ப்ரௌனீஸ் எப்படி செய்வதென்று தெரிந்து கொள்ள வேண்டுமா? கீழே சீஸ்கேக் ப்ரௌனீஸ் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

ப்ரௌனீஸ் செய்வதற்கு...

* வெண்ணெய் - 1/2 கப் (உருக்கியது)

* சர்க்கரை - 1 கப்

* வென்னிலா எசன்ஸ் - 1 டீஸ்பூன்

* முட்டை - 2

* சாக்லேட் சிப்ஸ் - 1/2 கப் (உருக்கியது)

* மைதா - 3/4 கப்

* கொக்கோ பவுடர் - 1/4 கப்

* உப்பு - 1/2 டீஸ்பூன்

சீஸ்கேக் லேயருக்கு...

* க்ரீம் சீஸ் - 100 கிராம்

* சர்க்கரை - 3 டேபிள் ஸ்பூன்

* முட்டை - 1

* வென்னிலா எசன்ஸ் - 1/2 டீஸ்பூன்

செய்முறை:

* முதலில் ஓவனை 180 டிகிரி C-யில் சூடேற்றிக் கொள்ள வேண்டும்.

* பின் 9x9 இன்ச் சதுர கேக் பேனில் பார்ச்மென்ட் பேப்பரை விரித்து தனியாக வைத்துக் கொள்ள வேண்டும்.

* பின் ஒரு பௌலில் உருக்கிய வெண்ணெய், சர்க்கரை, வென்னிலா எசன்ஸ் மற்றும் 2 முட்டைகளை உடைத்து ஊற்றி நன்கு கலந்து கொள்ள வேண்டும்.

* பின்பு அதில் மைதா, கொக்கோ பவுடர், உப்பு சேர்த்து கிளற வேண்டும்.

* அடுத்து அதில் உருக்கிய சாக்லேட்டை சேர்த்து நன்கு கலந்து கொள்ள வேண்டும்.

* பிறகு கேக் பேனில் இந்த கலவையை ஊற்றி பரப்பி தனியாக வைத்துக் கொள்ள வேண்டும்.

* பின்னர் ஒரு பௌலில் க்ரீம் சீஸ், சர்க்கரை, ஒரு முட்டை மற்றும் வென்னிலா எசன்ஸ் சேர்த்து நன்கு கலந்து கொள்ள வேண்டும்.

* பின் அதை கேக் பேனில் மேலே ஊற்றி பரப்பி விட வேண்டும்.

* பின்பு அதை ஒவனில் வைத்து, 30-35 நிமிடம் பேக் செய்து வெளியே எடுத்து குளிர வைக்க வேண்டும்.

* இறுதியாக அதை துண்டுகளாக்கினால், சுவையான சீஸ்கேக் ப்ரௌனீஸ் தயார்.

Image Courtesy: yummytummyaarthi